Leşkerên Tirk li nexweşxaneyê îşkence li girtiyê ji Rojava kir

Zekeriya Muhammed ê ji Rojava, li Girtîgeha Hîlwanê girtî ye. Dema leşkeran ew ji bo tedawiyê bir nexweşxaneyê, bi qundaxa çekên xwe lê da.

20 gulan, 2023 10:03

NAVENDA NÛÇEYAN

Zekeriya Muhammed ê ji Rojava, li Girtîgeha Hîlwanê ya Rihayê girtî ye. Leşkerên dewleta Tirk ji bo tedawiyê ew ji girtîgehê bir nexweşxaneyê lê lê da û tundî lê kir.

Muhammed bi îdiaya “endamtiya rêxistinê” 2 sal e girtî ye. Hat zanîn ku qirika wî êşiyaye û leşkeran ji bo tedawiyê ew biriye Nexweşxaneya Mehmet Akîf Înan a Rihayê û leşkeran li hucreya girtiyan a nexweşxaneyê bi qundaxa sîlehên xwe lê daye.

Hevserokê Komeleya Mafên Mirovan (ÎHD) a Şaxa Rihayê Mustafa Vefa ji bo ku li bûyerê bipirse çû girtîgehê. Vefa da zanîn ku hefteya borî roja sêşemê bûyer qewimiye û Muhammed ji ber ku destê wî hatiye şidandin, li ber vê rabûye û li ser vê yekê leşkeran ji Muhammed re gotiye “Tu kî yî, bi vî awayî bi me re diaxivî?” û lê dane. Vefa got leşkeran bi qundaxa çekan li serê Muhammed daye û tundî lê kiriye.

Vefa da zanîn ku serê girtî hatiye şikandin û kêl kirine. Vefa got dozger têkildarî bûyerê lêpirsîna îdarî û edlî daye destpêkirin. Vefa diyar kir ku dê giliyê leşkeran bikin û dozê bişopînin.