​​​​​​​4’emîn Komxebata Şêwekariyê 2 rojên din dest pê dike

Di salên dawîn de tevgera çand û hunerê li herêma Firatê geş bû. Di vê çarçoveyê gelek çalakî hatin lidarxistin. Ji wan Mîhrîcana Şanoyê ya "Arîn Biskên Aştiyê ", Mîhrîcana Kobanê ya Wêjeyî û gelek çalakiyên din ku bi sponseriya Desteya Çandê ya Herêma Firatê hatin organîzekirin.

Di 10’ê vê Gulanê de 4’emîn Komxebata Rojava ya Hunera  Şêwekariyê bi dirûşma " Bi hev em huner bikin buhara dilan" li bajarê Kobanê dest pê kir. Komxebat wê 16’ê Gulanê bi dawî bibe. Ji herêmên cûda yên Bakur û Rojhilatê Sûriyeyê û Helebê zêdetir 40 şêwekarên ku karên wan ji aliyê komîteyek hunerî ve hatin nirxandin û hilbijartin dê beşdarî komxebatê bidin.

Komxebat ji aliyê Desteya Çand û Hunerê ya Herêma Firatê ve û bi sponseriya Desteya Çandê ya Bakur û Rojhilatê Sûriyeyê tê birêxistinkirin. Armanc ji vê komxebatê ew e ku mohreke nû li tevgera hunerî ya li Kobanê bide û berhemên şêwekarên herêmî nîşanî aliyên derve bikin.

Piştî komxebat li Kobanê bi dawî bibe, dê 18’ê Gulanê heta 20’ê heman mehê pêşangeha şêwekariyê li bajarê Qamişloyê were vekirin.

Der barê girîngî û rola hunerê de, hevserokê Desteya Çand û Hunerê ya Herêma Firatê Dijwar Meşîd got: "Huner bingehê serketina şoreşan e. Em li Bakur û Rojhilatê Sûriyeyê şoreşekê ji hemû aliyan ve dimeşnin. Huner çeka herî girîng a serxistina şoreşa me ye. Ji ber vê yekê em hewl didin da ku hunera herêmê pêş bixin."

Dijwar Meşîd bang li şêwkarên li Bakur û Rojhilatê Sûriyeyê kir û got "Bila rîşa we çeka we be. Em ji berxwedana efsanewî ya ku gelên herêmê raber kiriye tabloyeke hunerî xêz bikin ku di dîrokî de zindî bimîne."

(bb)

ANHA