Şêniyên Reqayê 1'ê Gulanê pîroz kir

Şêniyên Reqayê Roja Kedkaran a Cîhanê pîroz kir û destnîşan kir ku karker hêmana sereke ya civakê ye ji ber ku ji bo pêşxistina welat û welatiyan kedê didin.

NÛÇE

30 nîsan, 2023 14:45

REQA

Rêxistinên civaka sivîl ên Reqayê bi boneya Roja Kedkaran a Cîhanê (1'ê Gulanê) li hola Tac a başûrê Reqayê şahiyek li dar xist.

Di şahiyê de endamên saziyên sivîl û leşkerî, partiyên siyasî û endamên Kombûna Jinan a Zenûbiya beşdar bûn.

Di serî de bi navê Nivîsgeha Aboriyê ya Kombûna Jinan a Zenûbiya Cîhan Mihemed 1'ê Gulanê li hemû kedkarên Bakur û Rojhilatê Sûriyeyê pîroz kir û got: "Divê em piştgiriyê bidin kedkaran da ku em dest bi dest aboriya welatê xwe pêş bixin."

Cîhan Mihemed wiha domand: "Bi saya kedkar û karkerên ku di germ û sermê de tevî hemû zehmetiyan dixebitin, dê civaka me pêş bikeve û aboriya me baştir bibe."

Di dawiya şahiyê de daxuyaniyek bi navê Yekitiya Kedkaran a Reqayê ji aliyê hevserokê yekitiyê Dahir El Ebdullah ve hat xwendin.

Di daxuyaniyê de hat destnîşankirin ku kedkar û karker hêmana sereke ya civakê ne ji ber ku ew ji bo pêşxistina welat û welatiyan û pêkanîna azadiya fîzîkî ya Rêber Abdullah Ocalan kedê didin.

(mh/şx)

ANHA