‘Partiya Çepên Kesk kilîta demokrasiyê ye’

Desteya Bilind a Hilbijartinan a Tirkiyeyê ragihand ku 26 partiyan lîsteyên namzetên xwe pêşkêş kirine, da ku beşdarî hilbijartinên parlamentoyê yên 14`ê Gulanê bibin.

Têkildarî mijarê kesayetên welatparêz ên Bakur û Rojhilatê Sûriyeyê nêrînên xwe bi ajansa me re parve kirin.

Mihemed Bedran ê ji bajarê Hesekê got dîroka AKP`ê bi komkujî, sûc û zilma li dijî gelên Rojhilata Navîn dagirtî ye û anî ziman ku divê gelên Tirkiyeyê serî ji siyasetên dewleta Tirk a dagirker re daneynin.

Bedran wiha axivî: “Ka azadiya li Tirkiyeyê? Ka wekhevî? Destilata Tirkiyeyê nahêle malbatên girtiyan serdana wan bikin, dengên ji bo azadiyê bilind dibin bê deng dike, wê demê azadî li ku ye?”

Mihemed Dawê jî diyar kir ku Partiya Çepên Kesk ji bo rêvebirina Tirkiyeyê partiya herî guncaw e û wiha dom kir: “Ji ber ku xwedî feraseteke demokratîk e ku dikeve xizmeta gelên Tirkiyeyê. Erdogan û partiya xwe dê di hilbijartinan li hember Partiya Çepên Kesk bi ser nekeve.”

Dawê bang li gelên Bakurê Kurdistanê û Tirkiyeyê kir ku dengê xwe bidin Partiya Çepên Kesk û wiha axaftina xwe bi dawî kir: “Partiya Çepên Kesk ji bo gelên bindest ên Tirkiyeyê kilîta aştî, demokrasî û azadiyê ye.”

(c)

ANHA