Rêveberiya Xweser 22 girtiyên din berdan

Di çarçoveya serbestberdana girtiyan de ji hêla Rêveberiya Xweser ve, Nivîsgeha Edalet û Çeksaziyê ya Rêveberiya Xweser a Bakur û Rojhilatê Sûriyeyê li gorî biryara Meclisa Edaleta Civakî 22 girtî ji girtîgeha Reqayê serbest berdan.

Li gorî xala 126′an a Qanûna Cezayên Giştî, ger cezayê girtiyan sê çaryek derbas kir û reftara wî bi nivîsekê ji rêveberiya girtîgehê re hate îsbatkirin, tên berdan.

Hevserokê Meclisa Sivîl a Reqayê Şêx Mihemed Nûr di dema serbestberdana girtiyan de got pêwîst e ku girtiyên werin serbestberdan, ferdên aktîf bin û li pey kiryarên zirarên didin, neçin.

Hevseroka Nivîsgeha Edalet û Çaksaziyê ya Rêveberiya Xweser Kefa Sencar boneya cejna Remezanê berdana girtiyan pîroz kir û wiha got: "Li gorî biryara Meclisa Edaleta Civakî û reftara baş a her ferdekî, girtî hatin berdan. Em bi hêvî ne ev yek ji bo wan bibe destpêkeke nû ku hemû neyîniyên xwe derbas bikin."

Rêveberiya Xweser 16′ê Nîsanê jî 60 girtî ji girtîgeha Elaya ya li Qamişloyê û girtîgeha Xiwêran a li Hesekê serbest berdan.

(fr)

ANHA