′Dê ala têkoşînê  li ba be′

Meclisa Malbatên Şehîda a Qamişloyê ji bo şervanê YPG′ê Mihemed Sarî (Baran Nisêbîn) merasîmê sersaxiyê li taxa Xerbî li dar xist. Baran Nisêbînê 14′ê Nîsanê di encama bombebarankirina balafireke bêmirov a dewleta Tirk a dagirker li dijî erebeyeke de li Qamişloyê şehîd bûbû.

Di merasîmê de bi sedan şêniyên Qamişlo û gundewarên wê, nûnerên saziyên Rêveberiya Xweser, hêzên leşkerî, ewlehî, saziyên sivaka sivîl û partiyên siyasî yên Qamişloyê beşdar bûn.

Li bin konê sersaxiyê wêneyên şehîd, wêneyên Rêber Abdullah Ocalan, alên YPJ, YPG, QSD′ê û Meclisa Malbatên Şehîdan hatin daliqandin.

Di merasîmê de endamê Meclisa Malbatên Şehîdan a Qamişlo Ubeyd Etê axivî û fedakariyên şehîdên Şoreşa Bakur û Rojhilatê Sûriyeyê silav kir.

Etê da zanîn ku divê têkoşîn were xurtkirn, hesab ji ajan û xwefiroşan were xwestin û wiha got: "Dewleta Tirk a dagirker hemû rê û rêbazan bi kar tîne da ku îradeya gelan têk bibe, Rêveberiya Xweser, projeya neteweya demokratîk û biratiya gelan bike hedef. Ji lew re divê em li dijî van ajanên dagirkeran bisekinin."

Etê şehîd Yûsif Gulo û wiha pê de çû: "Şehîd Yûsif Gulo her tim digot ew ê zarokên xwe ji bo azadiya gelan û doza Kurd feda bike. Em soz didin hevjîna şehîd Baran û her sê zarokên wî  ku em ê li ser rêça şehîd bimeşin. Rihê welatparêziyê têk naçe û dê ala têkoşînê bilind bimîne."

Endama Partiya Yekitiya Demokratîk (PYD)  Zên Eslan wiha got: "Şehîd Baran, kurê Bakurê Kurdistanê ji Nisêbînê ye. Di nava malbateke welatparêz de mezin bû, ji ber vê yekê tev li şoreşa li herêmê bû."

Merasîm bi xwendina wesîqeya şehîd û diruşmên "şehîd namirin" bi dawî bû.

(fr)

ANHA