Hevjîna şehîd Baran soza şopandina rêça wî da

Bi sedan şêniyên Qamişlo û gundewarên wê cenazeyê şehîdê YPG′ê Mihemed Sarî (Baran Nisêbîn) oxir kir. Di encama bombebarankirina erebeyekê li ser rêya Hîzam a Qamişloyê li nêzî deriyê Nisêbînê yê sînor de, ji hêla balafireke bêmirov a dewleta Tirk a dagirker ve, Baran Nisêbîn di 14′ê Nisanê de şehîd bûbû.

Di merasîmê de malbata şehîd, hevrêyên wî, girseya gel, endamên meclisên kantona Qamişlo, Tevgera Ciwanên Şoreşger a Sûriyeyê, Yekitiya Jinên Ciwan, nûnerên ji saziyên Rêveberiya Xweser, hêzên leşkerî û ewlehî beşdar bûn.

Şêniyan cenazeyê şehîd Baran ji pêş Meclisa Malbatên Şehîdan wergirt û berê xwe da Goristana Şehîd Delîl Sarûxan.

Li goristanê, endama Meclisa Malbatên Şehîdan a Qamişloyê Şemsêxan Gulo sersaxî da malbata şehîd Baran û rola wî di Şoreşa Bakur û Rojhilatê Sûriyeyê de pîroz kir û wiha got: "Şehîd Baran mînaka berxwedan, têkoşîn bû û ruhê welatparêziyê ji herêmên Rojava re anî û parastina şêniyan kir."

Şemsê wiha domand: "Şehîd Baran di tevahî şer û hemleyên li Bakur û Rojhilatê Sûriyeyê de beşdar bû. Şehîd baran hevalê kurê min yê şehîd Mihyedîn bû. Me bawer kir ku dê serkeftin para wan be û dê Şoreşa Bakur û Rojhilatê Sûriyeyê bi zendên keç û xortên wan bi ser bikeve."

Şemsê di dawiyê de got dê ala şehîdan bilind be û dê ruxmî êrişên dijmin xewnên wan pêk bên.

Endamê Meclisa Leşkerî ya Qamişlo Nezîr Sofî bal kişand ser rola şehîd Baran di hemleyên leşkerî û têkbirina çeteyên DAIŞ′ê de û got: "Di dîroka Kurdistanê de gelek lehengan di oxira rizgarkirina welat de canê xwe da û îro jî Baran tev li karwana şehîdan bû."

Sofî wiha domand: "Şehîd Baran banga welatiyên Rojava bersivand û ji Bakurê Kurdistanê hat û şerê çeteyên Cebhet El Nusra heta çeteyên DAIŞ′ê kir."

Di merasîmê de li dengê şehîd Baran û stranên wî yên şoreşgerî hate guhdarkirin.

Dûre endama Meclisa Malbatên Şehîdan a Qamişlo Revîn Şêxmûs wesîqeya şehîd baran xwend û radestî hevjîna wî Yusra Yûsif kir.

Yusra got dê hedefgirtina şehîd Baran li pêş berxwedan û têkoşîna wan nebe bend.

Yusra wiha domand: "Bila dijmin baş bizane, hedefgirtina Baran bû sedema bingehîn a tevlêbûna bi sedan welatiyan li refên têkoşînê. Ez ê her sê zarokên xwe li ser nirx û têkoşîna şehîd Baran perwerde bikim. Wê xwîna şehîd badilhewa neçe, namire û dê her zindî be."

Dê sibe li pêş mala şehîd a li taxa Xerbî ya Qamişloyê li nêzî dibistana Salih Ebdî saet 10:00′an merasîma sersaxiyê were lidarxistin.

(fr)

ANHA