Dermanên nexweşiya jehrîbûna xwînê tên belavkirin

Nexweşiya jehrîbûna xwînê, ji ber encama bakteriya ‘entrotoksemia’ çêdibe. Jehrîbûna xwînê yek ji nexweşiyên herî xeternak e ku di nava sewalan de belav dibe û dibe sedema mirarbûna wan.

Ev nexweşî li pez, çêlek, hesp û cureyên din dixe û di encamê de ziyaneke mezin digihîne xwediyên sewalan.

NÎŞANEYÊN NEXWEŞIYA JEHRÎBÛNA XWÎNÊ

Hin nîşaneyên vê nexweşiyê hene ku sewalkar dikarin tespît bikin, wekî; bilindbûna herareta laşê sewalan, kêmxwarin, zikêşiya xwînê ya sivik, werimîna zik û xwîn avêtin.

Beytar Heval Yûsif anî ziman ku pêwîstiya sewalan bi bernameyeke xwarinê, nemaze di dema guhertina êm de heye û dermankirina wan her şeş mehan carekê ye. Yûsif diyar kir ku nexweşiya jehrîbûna xwînê li berxên heta 15 rojî û pezên jorî yek saliyê dide.

Yûsif da zanîn ku ev nexweşî giran e û dermankirin bê fêde ye û got divê sewalkar li gorî bernameyeke parastina ji vê nexweşiyê tev bigerin û derziyan nedin berxikên kêmî 15 rojiyê.

HIŞKESALÎ SEDEMEK E

Yûsif destnîşan kir ku hişkesaliya ku li herêmê, bandoreke mezin li sewalan kir û nexweşî di nava wan de belav kir.

Ji bo rêgirtina li ber vê nexweşiyê Gerînendetiya Berhemên Sewaldariyê ya Desteya Çandinî û Avdanê derzî li komîteiyên xwe yên li tevahî bajar û navçeyan belav kirin da ku bê pere pêşkêşî xwediyên sewalan bikin.

(bb)

ANHA