Bûyerên kuştinê li Kampa Holê: Jineke din kuştî hat dîtin

Nûçegihanê me ji navçeya Holê ya kantona Hesekê ragihand ku îro Hêzên Ewlekariya Hundirîn cenazeyê jinekê di kanalîzasyoneke beşa 5’an a taybet bi koçberên sûrî de kuştî dît.

Li gorî Hêzên Ewlekariya Hundirîn, heta niha nasnameya jina hatiye kuştin nayê zanîn.

Bi vê bûyerê re, ji destpêka salê ve hejmara jin û mêrên li Kampa Holê hatine kuştin gihaşt 29`an.

Li gorî daneyan, hemwextî êriş û gefên dewleta Tirk a dagirker ên li dijî Bakur û Rojhilatê Sûriyê sûcên li Kampa Holê jî zêde bûne.

Hêjayî bibîrxistinê ku di roja duyemîn a Cejna Qurbanê de li beşa 3’yan cenazeyê mêrekî serjêkirî hate dîtin.

Hêzên Ewlekariya Hundirîn di 28`ê Hezîrana borî de li beşa 6’an a taybet bi koçberên sûrî, cenazeyê mêrekî ku bi guleyan hatibû kuştin dît. 25`ê Hezîranê jî li heman beşî cenazeyê jineke sûrî ya ji parêzgeha Humsê serjêkirî hate dîtin.

23`yê Hezîranê li heman beşî jineke bi guleyan hatibû hedefgirtin û birîndar bûbû.

Hêzên Ewlekariya Hundirîn her wiha di 22`yê Hezîranê de cenazeya jinekê li stada fotbolê ya beşa 3’yan a taybet bi penaberên iraqî kuştî dît.

Di heman demê de 14 jin û mêr birîndar bûbûn.

Kampa Holê xetertnaktirîn kampên cîhanê ye, ji ber ku malbatên çeteyên DAIŞ`ê yên sûrî, iraqî û çeteyên biyanî bi taybet ên ku Sibata 2019`an di Operasyona Bagera Cizîrê de xwe radestî Hêzên Sûriya Demokratîk kirine û hatine kampê, lê dimînin.

Li Kampa Holê 9 beş hene. Li gorî belgeyên rêveberiya kampê, li kampê 56 hezar û 97 kes dimînin, ji wan 29 hezar û 152 penaberên iraqî ne, koçberên sûrî jî 18 hezar û 863 ne.

Hejmara jin û zarokên çeteyên DAIŞ`ê yên biyanî jî digihêje 8 hezar û 109 kesî û ji 54 nasnameyên biyanî ne û li beşa 9`emîn a “Muhacîrat” dimînin.

(eh)

ANHA