Li Dêrazorê navenda Meclisa Civakî ya Ermenî hat vekirin

Di merasîma vekirina navendê de endamên Meclisa Civakî ya Giştî ya Ermenî ya bajarê Hesekê û endamên saziyên civaka sivîl û meclisên leşkerî û hejmarek ji şêx û rûspiyên eşîran amade bûn.

Merasîm bi rêzgirtinê dest pê kir, piştre serokê Meclisa Civaka Ermenî ya şaxê Dêrazorê Mihemed El-Ilêwî axivî û got: "Ji ber hovîtiya dewleta Osmanî, ji beriya 107 salan ve Ermen ji vê herêmê û gelek herêmên din ên cîhanê koçber bûne."

Mihemed El-Ilêwî spasiya hemû şêniyên Dêrazorê kir ku di dema koçberiyê de alîkariya gelê ermenî kirin û got: "Bi vekirina vê navendê em teqez dikin ku me doza ermenî û komkujiyên Osmaniyan ên sala 1915'an ku zêdeyî milyon û 500 hezar kes şehîd bûne ji bîr nekiriye."

Mihemed El-Ilêwî her wiha ev tişt anî ziman:"Amadebûna we li vir moral dide hemû welatiyên ermenî yên li Sûriyê bi giştî û Bakur û Rojhilatê Sûriyê bi taybet."

Mihemed El-Ilêwî spasiya Rêveberiya Xweser li ser keda wê di vekirina navendê de kir.

Serokê Meclisa Partiya Sûriya Pêşerojê ya gundewarê rojava yê Dêrazorê Zeîm El-Mehmûd jî vekirina navendê pîroz kir û got: "Tu cudahî di navbera pêkhateyên herêmê de tuneye, em hemû li hember projeyên têkbirina hevgirtina civakî yek dest in."

Endama rêveber a Komîteya Jinê ya Meclisa Sivîl a Dêrazorê de Hind El-Ehmed jî got:"Vekirina navenda Meclisa Civakî ya Ermenî li Dêrazorê teqezî li ser biratiya gelan piştî rizgarkirina herêmê ji DAIŞ'ê dike."

(şt)

ANHA