Li dijî qedexeya li ser PKK'ê li Kobanê kampanya îmzeyan

Li dijî qedexeya li ser Partiya Karkerên Kurdistanê (PKK), Meclisa Malbatên Şehîdan a Herêma Firatê kampanyaya komkirina îmzeyan da destpêkirin. Heta niha bi sedan şêniyan îmze dan.

Têkildarî mijarê welatiya bi navê Feyrûz Mihemed Elî got: "PKK'ê ji 40 salî ve hatiye avakirin. Hege partiyeke terorîst be wekî ku dibêjin wê demê ewqas mezin nedibû û me piştgirî nedidayê. Em fedayî vê partiyê ne, ji ber ku hişt ku em zimanê xwe yê kurdî biparêzin, hebûna xwe îsbat bikin û azadiyê jinê misoger bikin. Ev partî destekê dide her kesî û ji bo azadî û rûmeta gelê me fedekariyan dide. PKK wê aştiyê ji herêmê re bîne."

Feyrûz Mihemed Elî bang li rêxistinên mafên mirovan û Neteweyên Yekbûyî kir ku biryarên xwe di ber çavan re derbas bikin û PKK'ê ji "lîsteya terorê" derxin.

Welatiyê bi navê Îbrahîm Mihemed Elî yê ji pêkhateyê Ereb anî ziman ku PKK'ê tevahî gelan diparêze û ji bo pêkanîna aştî û biratiya gelan tê dikoşe. Elî wiha domand: "Ev jî îsbat dike ku ev partî ne terorîst e, lê terorîstê rasteqîn dewleta Tirk e ku komkujiyan li dijî gelê me pêk tîne."

Îbrahîm Mihemed Elî banga rakirina qedexeya li ser PKK'ê kir.

Kampanya wê li gelemperiya kantona Kobanê dewam bike.

ANHA