Şehîd Îbrahîm û Temo li Kobanê hatin oxirkirin

Şervanê QSD'ê Rêber Temor (Şiyar Şêran) ji navçeya Şêran e, dema erka xwe bi cih dianî di encama krîza dil de şehîd bû. Endamê Tevgera Ciwanên Şoreşger a Sûriyê  Mesûd Îbrahîn (Behdînan Kobanê) ji gundê Ziravkê ye, 25'ê Kanûnê di encama êrişa hewayî ya dewleta Tirk a dagirker li Kobanê de bi giranî birîndar bûbû û li nexweşxaneyên bajarê Minbicê de şehîd bû.

Girseya gel cenazeyên şehîdan ji deriyê ketina bajarê Kobanê wergirtin û bi kerwanekî ber bi Goristana Şehîd Dîcle ve ketin rê. Kerwanê cenaze li goristanê ji aliyê sedan kesî ve hat pêşwazîkirin.

Li goristanê hevserokê Desteya Ciwan û Werzîşê û endama Yekitiya Jinên Ciwan a herêma Firatê Xunav Xelîl axivî û destnîşan kir ku dewleta Tirk a dagirker ciwanan dike hedef, ji ber ku dizane ew bingeha civakê ne û ji wan birêxistinkirin û têkoşîn destpê dike.

Xunav Xelîl di axaftina xwe de got, Partiya Demokrat a Kurdistanê (PDK) û civata navneteweyî berpirsên  komkujiyên dewleta Tirk a dagirker ên li Bakur û Rojhilatê Sûriyê ne.

Her wiha Xunav Xelîl anî ziman ku  heta paqijkirina herêmê ji xayîn û ajanan têkoşîna wan berdewam e û soza şopandina rêya şehîdan da. Her wiha destnîşan kir ku êrişên li dijî herêmê vîna gel naşikîne, lê belê israra wan a pêkanîna serkeftinê xurtir dike.

Di merasîmê de endamê Desteya Rêveber a Partiya Yekitiya Demokratîk (PYD) Ehmed Şêxo axivî û diyar kir ku dewleta Tirk armanc dike destkeftiyên şoreşê yên ku bi saya şehîdan pêk hatine, têk bibe.

Ehmed Şêxo wiha berdewam kir: “Ez di wê baweriyê de me ku kesek nikare ew têkiliya xurt di navbera gelê herêmê û şehîdan de qut bike. Bi rêya kiryarên derexlaqî, ajan û xayînan wan bi xapîne. Dijmin dizane ku nikare şoreşa Rojava û gelê wê yê berxwedêr tune bike. Lewra hewl dide planên xwe bi rêya kiryarên derexlaqî pêk bîn.”

Ehmed Şêxo bang li gelê herêmê kir ku baldar bin û di destê dijmin de nebên amûr. Her wiha pêwîstiya parastina Rêveberiya Xweser û xwedî lê derketinê teqez kir.

Piştî bidawîbûna axaftinan Meclisa Malbatên Şehîdan wesîqeyên şehadeta şehîdan xwendin û radestî malbatên wan kirin.

Di dawiyê de girseya gel cenazeyên her du  şehîdan bi diruşmeyan veşartin.

(şx)

ANHA