​​​​​​​Malbatên gerîlayan bang li PDK`ê kir ku ji dijminan dûr bikeve

Li dergeha Sêmalkayê ji destpêka Cotmeha derbasbûyî ve çalakiya konvedanê ya li ser banga Meclisa Malbatên Şehîdan ên Herêma Cizîrê, berdewam dike. Di çalakiyê de gelê Bakur û Rojhilatê Sûriyê nerazîbûna xwe li hemberî siyaseta PDK`ê nîşan da, di serî de hedefgirtina gerîlayên HPG`ê û radestnekirina cenazeyên şehîdên kemîna Xelîfanê.

Malbatên şehîdan û gerîlayên HPG`ê yên li Bakur û Rojhilatê Sûriyê hîn jî banga radestkirina şehîdan ji malbatên wan re dikin, her wiha bang li PDK`ê dikin ku nekeve xefika planên dewleta Tirk a dagirker û dev ji derxistina fitneyên di navbera gelê Kurd ên her çar parçeyên Kurdistanê berde.

Têkildarî mijarê Foza Omer xwişka şehîd Remziye Omer, siyaseta PDK`ê ya li dijî Kurdan şermezar kir û got ev yek xizmeta dijminên Kurdan dike û got: "Ma gelo heta kengî dê destê PDK`ê di destê dagirkerên Kurdistanê de be? Li şûna vê yekê divê piştgiriya gelê xwe bike, ji wan gerîla û li dijî çi kesên hewldana tunekirina doza gelê wan dike, li kêleka gerîlayan şerê wan bike. Em ê li bin konê Sêmalkayê heta ji ser vê yekê vegere li ber xwe bidin."

Li aliyekî din jî Cîhan Derwîş a ji navçeya Dirbêsiyê ya kantona Hesekê ku diya gerîlayeke HPG`ê ye, got: "Li pêşiya konê çalakiyê ku dê heta radestkirina cenazeyên şehîdan û veşartina wan bi merasîmeke layiqî wan berdewam bike, em piştgiriya çalakgeran dikin."

Gulbihar keça Cîhan Derwîş 2014`an li dijî çeteyên DAIŞ`ê şer kir û ji lingê xwe birîndar bû, lê piştî hate dermankirin careke din vegeriya Herêmên Parastinê yên Medyayê û li dijî artêşa Tirk li ber xwe dide.

Cîhan Derwîş diyar kir ku dayikên gerîlayan ji bo mafên xwe û mafên gelê herêmê dê her tim li kêleka zarokên xwe yên di nav refên gerîla de, tê bikoşin û wiha dewam kir: "Divê her Kurdek ji doz û neteweya xwe hez dike, li pêşiya konê çalakiyê piştgiriya malbatên şehîdên gerîla bike."

Cîhan Derwîş di berdewamiya gotina xwe de ev pirs kir: "Çawa hikumeta Başûr dikare derbasbûna cenazeyên gerîlayên ji bo zimên û doza xwe şehîd bûne, qedexe bike?"

Cîhan Derwîş bi domdarî got: "HPG bi salan e li Herêmên Parastinê yên Medyayê û tevahiya çiyayên Kurdistanê şer dike, her wiha di demekê de ku hêzên PDK`ê reviyan, li dijî çeteyên DAIŞ`ê jî şer kir û gelê Şengalê ji hovîtiya wan rizgar kir. Li Herêmên Parastinê yên Medyayê li dijî dijminên gelê Kurd şer dikin da ku parastina doza xwe û Kurdistanê bikin, ji lew re em bang li PDK`ê dikin ku dûrî xiyaneta li Kurdan bikeve û ji bo doza xwe û radestkirina şehîdan ji malbatên wan ên li Rojava kar û xebatê bike."

Foza Omer jî piştrast kir ku HPG`ê bi armanca rizgarkirina gelan ji komkujî û sûcên der heqê wan pêk tê, şer dike û parastina doz û mafên xwe dikin.

(eh)

ANHA