Zarokên Efrînê banga parastina zarokan ji sûcên dagirkeran kir

Bi sedan zarokên herêma Efrînê li çerxerêya komkujiya navçeya Til Rifet kom bûn û dirûşmeyên şermezarkirina sûcên dewleta Tirk a dagirker berz kirin û wêneyên zarokên ku di topbarana li ser Til Rifet de şehîd bûne û pankartên bi nivîsa "Duh Mihemed El-Dura bû û îro jî zarokên Efrînê ne” hildan.

Daxuyanî ji aliyê zaroka bi navê Mesila Hesen û Robîn Seyd ve bi zimanên erebî û kurdî hate xwendin.

Daxuyanî wiha ye: "Em Roja Zarokan a Cîhanê li tevahî zarokên cîhanê pîroz dikin. Di sala 1954`an de NY`yê ev roj wke Roja Zarokan a Cîhanê ragihand. Di heman rojê di sala 1989`an de peymana mafên mirovan hate erêkirin û ji ber wê jî divê ev roj neyê paşguhkirin.”

Di daxuyaniyê de hate gotin ku li cîhanê gelek zarok bê parastin dijîn û dibin qurbaniyên şerên navneteweyî. Her wiha bi milyonan zarok dibin qurbanê tecawizkirin, birçêbûn û xizaniyê û wiha dewam kir: “Pêwîst e hemû zarokên cîhanê bêyî cudayî wein parastin û bi aştî bijîn, mafên ewlehî, perwerde û tenduristiyê bi dest bixin. Lê belê ev roj tê paşguhkirin.

Rewşa zarokên Sûriyê pir metirsîdar e. Bi hezeran zarok birçî, xizan, sêwî û nexweş in û bêyî perwerde û bê war in. Zarok ji ber sûcên dewleta Tirk û bikaranîna çekên kîmyewî rastî kuştin û komkujiyan tên, weke komkujiya Til Rifet ku di encamê de 8 zarok şehîd bûn û komkujiya Serêkaniyê ku hejmareke mezin ji zarokan bi gazên jehrî şehîd bûn. Tevî vê yekê jî lê wijdanê mirovahiyê miriye nexasim rêxistinên mafên zarokan, rêxistinên navneteweyî û mafên mirovan ku qêrîna zarokên Sînemaya Amûdê, Mihemed Hemîd û bi hezaran zarokan nabihîzin.

Em sûcên dewleta Tirk li dijî zarokatiyê şermezar dikin. Mafê hemû zarokan hene ku jiyaneke kêfxweş bijîn û bên parastin da ku karibin xwe pêş bixin.

Em banga cîhaneke aştiyane û aram dikin. Em bang li hemû sazî û rêxistinan dikin ku erka xwe li hember zarokan pêk bînin, wan biparêzin û şeran rawestînin."

(bx)

ANHA