Li dijî tecrîda li ser rêber Ocalan li Minbicê çalakiya konvedanê dest pê kir

Li Minbicê çalakiya konvedanê ji aliyê Akademiyên Civaka Demokratîk ve hate birêxistinkirin û bi armanca şermezarkirina Komploya Navneteweyî ya li dijî rêber Abdullah Ocalan û rakirina tecrîdê li parka giştî ya navenda bajêr kon hate vedan.

Endamên saziyên sivîl û leşkerî û saziyên jinan, beşdarî çalakiyê bûn. Çalakiyê bi rêzgirtinê dest pê kir. Piştre endamê Akademiyên Civaka Demokratîk a Minbicê Refet El-Xelef got: "Em peyamekê ji civaka navneteweyî û rêxistinên mirovahî re dişînin ku tecrîda li ser rêber Ocalan rakin û ji zindanê derxin. Em komploya ku li dijî rêber Ocalan û bi giştî gelên herêmê, şermezar dikin."

El-Xelef wiha lê zêde kir: "23 sal berê, dagirkeriya Tirk bi piştgiriya îstîxbaratên navneteweyî bi armanca tunekirina ramana azad a gelê Kurd û gelên Rojhilata Navîn, komployek ji bo girtina rêber Abdullah Ocalan pêk anî.”

Endama Komîteya Rêber a Minbicê Asya El-Hisên jî got rêber Ocalan zindan veguhrand navenda zanist û zanyariyê û bi rêya parêznameyên xwe ew zanist li ser gelên herêmê belav kir.

Cîgirê serokê Meclisa Rêveber a Minbicê Cûma El-Heydar jî got: "Armanca komployê ne tenê girtina rêber Abdullah Ocalan e, lê armanca wê ramana rêber Ocalan e ku bi rêya wê hewl dide bi her cure desthilata modernîteya kapîtalîst têk bibe."

Tê payîn ku çalakiyên li kon heta saet 17.00’an bidomin.

(dx)

ANHA