Çalakiyên jinan misogeriya berdewamkirina têkoşîna şehîd Zîlan e

Şêniyên kantona Qamişloyê şehîd Zîlan di salvegera şehadeta wê ya 25`emîn de bi bîr anî û piştrast kir ku çalakiya wê asta têkoşîn û berxwedanê bilind kir û hêviyên gelan pêk anîn.

NÛÇE

30 hezîran, 2021 12:37

QAMIŞLO

Îro şêniyên kantona Qamişloyê şehîd Zîlan (Zeyneb Kinacî) ku di 30`ê Hezîrana 1996`an de di encama çalakiyeke fedayî ya li dijî artêşa Tirk de li bajarê Dêrsimê şehîd bû, bi bîr anîn.

AMÛDÊ

Tevgera Kevana Zêrîn û Kongreya Star li navenda Hûrî ya Çand û Hunerê ya navçeya Amûdê semînerk da û şehîd Zîlan bi bîr anî. Piştî rêzgirtinê ji rêveberên Kongreya Star Avaşîn Hesen Bedir axivî û berxwedana ku li Herêmên Parastinê yên Medyayê tê kirin, silav kir.

Paşê nameya şehîd Zîlan ji aliyê endama Meclisa Kongreya Star a Rojava Bêrîvan Yûnis ve hate xwendin. Di dawiyê de Koma Ciwanên Hûrî stran pêşkêş kirin.

ÇILAXA

Girêdayî mijarê bi dehan şêniyên navçeyê li Navenda Çand û Hunerê ya navçeyê kom bûn.

Merasîma bîranînê bi rêzgirtinê dest pê kir. Paşê endama Komîteya Perwerdeya Kongreya Star Semer Hesen nameya şehîd Zîlan a ji rêber Abdullah Ocalan re xwend û destnîşan kir ku şehîd Zîlan bûye sembola jinên têkoşer û azad.

Di dawiyê de sînevîzyon der barê têkoşîna şehîd Zîlan û çalakiya wê ya fedayî de hate pêşandan.

GIRKÊ LEGÊ

Tevgera Çand û Hunerê bi koordînasyona Kongreya Star a Girkê Legê li Hola Aram Tîgran a bajarokê Rimêlanê şehîd Zîlan bi bîr anî.

Hevserokê Meclisa Malbatên Şehîdan a Girkê Legê Qehreman Mihemed têkildarî têkoşîna şehîd Zîlan axivî. Paşê sînevîzyon hate pêşandan û di dawiyê de Koma Elîna û Koma Koçeran stran pêşkêş kirin.

(bx)

ANHA