Meclisa Leşkerî ya Minbicê: Divê şênî ji hewldanên derbekirina ewlehî û provaksyonan hişyar bin

Fermandariya Giştî ya Meclisa Leşkerî ya Minbicê bi daxuyaniyekê nirxandina bûyerên vê dawiyê li bajarê Minbicê qewimî kir.

Daxuyanî wiha ye:

ꞌꞌPiştî bûyerên dawî yên ku li bajarê Minbicê rû dan, di encamê de hin qurbanî çêbibin, ji lew re em mixabiniya xwe tînin ziman û sersaxiyê ji malbatên qurbaniyan re dixwazin, her wiha piştrast dikin ku em ê li hemberî wan bi erka xwe ya qanûnî û exlaqî rabin û em ê piştgiriyê bidin gel û xwestekên wan û li gel wan bisekinin.

Lê hin kes hene ku berê bûyeran bi aliyekî din ve dibin û çareseriyan asteng dikin, her wiha ewlehî û aramiya Minbicê û gundewarên wê têk bibin.

Heta niha hêzên me destwerdan li van bûyeran nekiriye, lê belê me tedbîr girtin ku alozî çênebe û mezin nebe. Ji ber komîte hatin avakirin, da ku li ser vê yekê bisekinin û rastiyan eşkere bikin. Hêzên me her tim ji bo aramî û ewlehiyê li pêş bû û di rizgarkirina bajêr ji terorê de jî li pêş bû.

Di vê dawiyê de hin aliyan hewl da aramiya bajêr derbe bikin û rewş ji bo ji ajandeyên derve û berjewendiyên xwe pêk bînin. Ew jî bi rêya belavkirina çekan ku li dijî me, şênî û saziyên me bi kar bînin. Li ser vê bingehê, em bang li şêniyên Minbic û gundewarên wê dikin ku ji provaksiyon û tevliheviyan hişyar bin û derfetê nedin wan kesan ku ewlehî û aramiya welatê me têk bibin.

Em piştrast dikin ku em li dijî her kesê hewl bide ewlehiya bajarê me derbe bike, bisekinin û em nahêlin kesên dixwazin ji nû ve DAIŞ’ê û yên wek wê li Minbicê vegerin, bigihînin armancên xwe."

(eh)

ANHA