Ciwanên Efrînê bi meşeke meşaleyî berxwedana gerîla silav kir

Tevgera Ciwanên Şoreşger a Sûriyê ya Herêma Efrînê bi meşeke meşaleyî piştgiriya xwe ji bo berxwedana gerîla ya li hemberî êrişên dagirkirinê yên dewleta Tirk nîşan da.

6 hezîran, 2021 20:13

ŞEHBA

Meş bi diruşmeya "Beşdarî Cenga Azadiyê bibin", hate lidarxistin. Bi dehan endamên Tevgera Ciwanên Şoreşger a Sûriyê û Yekitiya Jinên Ciwan bi wêneyên rêber Abdullah Ocalan û alên ciwanan, ji ber avahiya Meclisa Kantona Şehbayê ya li navçeya Ehdasê dest bi meşê kir.

Meş bi berzkirina diruşmeyên silavkirina berxwedana gerîla û rêber Abdullah Ocalan, di nava kolanên navçeyê de geriya û li qada navçeyê veguherî mîtîngê.

Mîtîng bi deqeya rêzgirtin a bîranîna cangoriyên azadiyê dest pê kir. Piştre ji rêveberên Tevgera Ciwanên Şoreşger a Sûriyê ya Herêma Efrînê Reşîd Efrîn axivî û got: "Ji bo şermezarkirina êrişên dagirkeriyê yên dewleta Tirk ên li ser Herêmên Parastinê yên Medyayê me ev çalakî li dar xist. Her kes dibîne ku dewleta Tirk a dagirker êrişên hovane li dijî çiyayên Kurdistanê pêk tîne. Her kes dizane ku ev êriş ne tenê ji aliyê dewleta Tirk a faşîst ve têne kirin, lê belê ji aliyê gelek dewletan ve têne kirin ku li dijî gelê Kurd û hêzên gerîla bi taybet komployekê plan dikin. Êrişên li ser gerîla hewldaneke ji bo îmhakirina dîroka gelê Kurd e ku ji hezarên salan ve hatiye nivîsandin."

Reşîd Efrîn di dawiya axaftina xwe de got: "Em ciwanên rêber Abdullah Ocalan in, em ê li hemberî êrişên li ser Herêmên Parastinê yên Medyayê bisekinin. Ev êrişên dagirkirinê berfireh dibin û gihiştin Mexmûrê, bi hezaran sivîl di nava bêdengiyeke navneteweyî ya şermok de têne hedefkirin."

Meş bi berzkirina diruşmeyên silavkirina berxwedana gerîla bi dawî bû.

ANHA