Şehîd Alan Bênê hate oxirkirin

Bi sedan koçberên Efrînê û şêniyên Şehbayê li pêşiya Nexweşxaneya Şehîd Avrîn a li navçeya Fafînê kom bûn da ku cenazeyê şehîd Alan Bênê wergirin.

Şehîd Basil Hisên (Alan Bênê) di 16`ê Nîsanê de, di şerê li dijî artêşa Tirk a dagirker ê li derdora navçeya Şêrawa de şehîd bûbû.

Merasîm li pêşiya nexweşxanê bi rêzgirtinê dest pê kir. Paşê endamê Meclisa Malbatên Şehîdan a herêma Efrînê Receb Mistefa axivî û sersaxî ji malbata şehîd re xwest. Receb Mustefa got: "Şehîd Alan ji bo rizgarkirina xaka xwe ji dagirkeran, şehîd bû. Em soz didin ku em ê heta pêkanîna armancên wî di rizgarkirina Efrînê de, şopdarên rêya wî bin."

Her wiha endama Kongreya Star Necah Hisên diyar kir ku dagirker sivîlan dikujin, malên li gundewarên Şehbayê dikin hedef, bi domdarî Efrînê topbaran dikin û ev siyaseta dagirkeran a qirêj e da ku şêniyan koçber bikin.

Paşê wesîqeta şehadetê hate xwendin û radestî malbata şehîd hate kirin.

Di dawiyê de şênî bi karwanekî ber bi goristana gundê Bênê yê navçeya Şêrawayê ketin rê û cenazeyê şehîd Alan di nava dirûşman de, spartin axê.

(bx)

ANHA

<iframe width="560" height="315" src="https://www.youtube.com/embed/pxxwNGFH7cQ" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>