Bi hezaran şêniyên Til Temirê Newroz pîroz kir

Vê sibehê bi hezaran şêniyên Til Temirê bi hemû pêkhateyên xwe û cilên folklorî berê xwe dan gundê Qesrik ê rojhilatê navçeyê ya li ser rêya Qamişlo, da ku beşdarî şahiya Newrozê bibin.

Şahî bibîr anîna cangoriyên azadiyê dest pê kir. Piştre, agirê Newrozê hate pêxistin û gel li gotinên rêber Abdullah Ocalan ên der barê Newrozê guhdar kirin.

Piştre, koma Gerstêrk stran digel diruşmên gel, rakirina nîşaneya serkeftinê û gerandina dîlanan de, pêşkêş kirin û koma Şoreş jî stranên şoreşgerî pêşkêş kirin.

Di şahiyê de, bi navê Rêveberiya Xweser a Bakur û Rojhilatê Sûriyê Abdulxenî Oso axivî û Newroz li tevahî gelan pîroz kir û wiha got: "Ev roj roja azadiyê ye ku gel li hember zulm, dagirkerî û sûcan disekine."

Oso soza xwe ya bi berxwedana heta bi ragihandina serkeftinê nû kir û wiha domand: "Gelên herêmê soz şopandina rêça Mezlûm Dogan û hevrêyên wî daye."

Oso diyar kir ku ji 2011’an ve gelek alî hewl didin tevliheviyê li herêmê çêbikin, lê gelên herêmê rêya berxwedan û sekna li hember tevahî aliyên dijber hilbijartiye, zulm û sûcan qebûl nake.

Oso wiha gotina xwe berdewam kir: "Em xwe dispêrin diruşma Berxwedan Jiyan e, ew diruşmeya şehîd Mezlûm Dogan e."

Her wiha şervanekî bi navê Rêdûr Feqîra hîn gotinên rêber Abdullah Ocalan ên li ser berxwedan û bidestxistina azadî û gihandina armancên xwe, xwendin.

Şahî bi stranên şoreşgerî yên ji hêla koma Şoreş û koma Xabûr û gerandina dîlanan ji hêla gel ve bi dawî bû.

(fr)

ANHA