Koçberên ji Serêkaniyê yên li Kampa Waşûkanî dagirkeriya dewleta Tirk şermezar kir

Bi boneya derbasbûna salekê di ser dagirkirina Serêkaniyê û Girê Spî re ji aliyê dewleta Tirk a dagirker û çeteyên wê ve, Kongreya Star li Kampa Waşûkanî ya li kantona Hesekê xwepêşandanek bi rêxistin kir.

Beşdarên meşê alên Kongreya Star, QSD`ê û pankartên “Em ê dagirkeriyê bi dawî bikin, nirxên şoreşa xwe biparêzin”, “Em ê vegerin Serêkaniyê”, “Em berxwedana gelên Efrîn, Serêkaniyê û Girê Spî silav dikin” rakirin.

Koçberên kampê li pêşiya rêveberiya Kampa Waşûkanî rawestiyan û deqeyekê rêz girt. Piştre endama rêveberiya Kongreya Star li Kampa Waşûkanî Besîme Dawûd axivî û diyar kir ku dewleta Tirk a dagirker êrişê herêmên Kurd, Ereb û Ermenan dike.

Besîme Dawûd wiha dewam kir: “Çavnebariyên dewleta Tirk bê dawî ne. Gelo Kurd li Lîbya, Azerbêcan, Ermenistan û Yewnanistanê jî hene? Erdogan hemû nirxên mirovî û pîvanên navneteweyî binpê kirin û rûxandin û mirin ji gelê me re anî. Mafê me ye ku em xwe biparêzin.”

Elaa El-Dîn Cemîl jî bi navê Meclisa Kampa Waşûkanî wiha axivî: “Dewleta Tirk herêm û bajarên me dagir dike û sivîlan bi darê zorê dide koçberkirin. Kiryarên Tirkiyê berdewamkirina komploya navneteweyî ya li dijî rêber Abdullah Ocalan e.”

Ahîn Elî jî bi navê Partiya Yekitiya Demokratîk (PYD) şaxê Hesekê axivî û destnîşan kir ku gelên Bakur û Rojhilatê Sûriyê di mercên zehmet re derbas dibin û dewletên kapîtalîst bi hemû rêbazan şerê gelên herêmê dikin.

Xwepêşandan bi dirûşmên silavkirina berxwedana rûmetê û şermezarkirina dagirkeriyê bi dawî bû.

(cx)

ANHA