Şêniyên Şêrawa berxwedana Heftenînê silav kirin

Bi sedan şêniyên navçeya Şêrawa li gundê Ziyaretê yê navçeya Şêrawa ya kantona Efrînê kom bûn û pankartên bi nivîsên `Na ji hovîtiya dewleta Tirk re`, `Bijî berxwedana Heftenînê`, `Tirkiyê axa me dagir dike, zarokên me dikuje û Rûsya bê deng in`, `Serkeftina berxwedana Heftenînê serkeftina gelan e`, `Bi şerê gelê şoreşger û bi lehengiya gêrîla em ê dagirker û xiyanetê têk bibin` û wêneyên şehîdên komkujiyên Til Rifat û Aqîbê û wêneyên rêber Abdulla Ocalan hil dan. Her wiha sloganên silavkirina berxwedana HPG`ê li Heftenînê û berxwedana gelê Efrînê li Şehbayê berz kirin.

Meş ber bi Kampa Veger a li ber deriyê têketina gund e ve destpê kir. Meş li kampê rawestî û veguherî mitîngê. Di mitîngê de endamê Meclisa Navçeya Şêrawa Ehmed Silêman axivî û got: “Ji destpêka şoreşa 19`ê Tîrmehê ve artêşa Tirk a dagirker bi rêya çeteyên xwe hewl dide çirûska şoreşê vemirîne. Ji bo wê jî bi rêya çete û artêşa xwe êrişî herêmên Kurdan dike û şerê taybet li dijî herêmê dimeşîne.”

Silêman destnîşan kir ku artêşa Tirk a dagirker piştî ku Efrîn, Serêkaniyê û Girê Spî dagir kirin, niha jî bi armanca vegerandina serdema imperatoriya Osmanî, hewl dide herêma Heftenîn û gelek herêmên din dagir bike.

Silêman di dawiyê de bal kişand ser siyasetên dijminahî yên artêşa Tirk a dagirker li dijî Bakur, Başûr û Rojavayê Kurdistanê kir.

Endama Meclisa Kampa Veger Leyla Ednan axivî û pêwîstiya yekitiya gelê Kurd li hemberî planên dewleta Tirk a ku hewl dide, bakur, başûr û rojavayê Kurdistanê dagir bike, piştrast kir.

Meş bi berzkirina dirûşmên silavkirina berxwedana li dijî dewleta Tirk a faşîst bi dawî bû.

(şx)

ANHA