​​​​​​​Şêniyên Minbicê cenazeyê şehîd Alaa Selama spartin axê

Bi sedan şêniyên Minbicê û şervanên Meclisa Leşkerî ya Minbicê bi karwanekî ji pêşiya nexweşxaneya Furat a bajarê Minbicê ber bi goristana Şehîdan a başûrê bajarê Minbicê  bi rê ketin. Şêniyan alên Meclisa Malbatên Şehîdan, Meclisa Leşkerî ya Minbicê û wêneyên şehîd Alaa rakirin.

Li goristanê merasîmê bi toraneke leşkerî ji aliyê hêzên Meclisa Leşkerî ya Mibicê ve dest pê kir û deqeyekê rêz hate girtin. Piştre endama Meclisa Leşkerî ya Minbicê Werde El-Ehmed banga dilsoziya bi şehîdan re û şopandina rêya wan kir û got: "Divê destkeftiyên şehîdan bên parastin."

Bi navê Meclisa Malbatên Şehîdan Henadî Mihemed axivî û got: "Bi saya fedekariyên şehîdan îro em jiyaneke azad û bi rûmet dijîn."

Bi navê Rêveberiya Sivîl a Demokratîk a Minbic û gundewarên wê serokê Komîteya Kar û Barên Olî ya Minbicê Elî El-Cemîlî jî axivî: "Ji bo azadî, jiyana bi rûmet, jiyana hevbeş û jiyaneke demokratîk, şehîdan xwe feda kir."

Endama Meclisa Jinan Rîm Derwîş jî sersaxî ji malbata şehîd re xwest û kiryarên li dijî jinan pêk tên şermezar kir.

Her wiha birayê şehîd Alaa Mihemed Selama jî li ser navê malbatê wiha axivî: "Em bi şehadeta xwişka xwe Ceylan serbilind in. Ew niha ne tenê keça malbatekê ye, ew keça gel e."

Piştî axaftin bi dawî bûn, wesîqeya şehadetê hate xwendin û radestî malbatê hate kirin. Piştre cenazeyê şehîd di nava tilîliyên dayikan de hate veşartin.

(cx)

ANHA