Şehîd Dilşêr Kefer Nasih bi merasîmeke heybet hat oxirkirin

Şêniyan cenazeyê şehîd Elî Kinco (Dilşêr Kefer Nasih) ê ji pêkhateyên ereb, ji nexweşxaneya Avrîn a li navçeya Fafînê wergirtin.

Piştre şêniyan bi karwanekî ji dehan erebeyan ber bi cihê jidayîkbûna şehîd Dilşêr gundê Kefer Nasih ê girêdayî navçeya Ehres a kantona Şehbayê ve, ketin rê.

Li qada gund, merasîmê bi rêzgirtinê dest pê kir. Piştre endamê Meclisa Malbatên Şehîdan a kantona Şehbayê Mihemed Welo axivî û sersaxî ji malbata şehîd re xwest.

Hevseroka Meclisa Rêveber a Rêveberiya Xweser a kantona Efrînê Şîraz Hemo jî, wiha axivî:"Di şexsê şehîd Dilşêr Kefer Nasih de, em hemû şehîdên azadî û demokrasiyê bi bîr tînin."

Şîraz Hemo bi van gotinan axaftina xwe berdewam kir:"Dewleta Tirk a dagirker, Sûriyê veguherandiye qadeke şer, ku gelê Sûriyê ji ber vê şerî rastî kuştin, rûxandin, talankirin, koçberkirin û komkujiyan hat. Duh li Til Rifetê, îro jî li Aqîbê komkujî pêk hat. Rûyê rast ê Erdogan ev e."

Şîraz di dawiyê de sersaxî da malbata şehîd Dilşêr.

Piştre endama Meclisa Malbatên Şehîdan Nayif Elî El-Wîsê wesîqeya şehadetê xwend û radestî malbata şehîd kir.

Di dawiyê de cenazeyê şehîd di nava tilîlî û dirşûmeyên "Şehîd namirin" de, hat veşartin.

(bx)

ANHA