Tevî temenê xwe yê mezin, felsefeya Ocalan belav dike

Apê Îsmaîl bi gotina rêbertî ya"Girêdana bi armancê ve, jêdera hêzê ye"jînenîgariya têkoşîna xwe berdewam dike û felsefeya Ocalan belav dike.

NÛÇE

15 sibat, 2020 07:48

HELEB-HENAN MIHMED-MIHMED EBDO

Bi armanca parastina mafên xwe yên rewa gelek malbatên taxa Şêxmeqsûdê çi di dema rejîma Baas de û çi di nava salên şoreşê de be, berxwedaneke efsûnî nîşan dan.

Apê Îslamîl Xelîl Qeblan(90) ku ji gundê Holyo yê navçeya Raco ye û bavê 4 xort û 3 keçan e yek ji wan malbat e. Kurî apê Îsmaîl Mihmed Qeblan(Bedran)di sala 1995`an di nava HPG`ê şehîd bû.

Apê Îsmaîl di salên 90 de Tevgera Rizgariya Kurdistanê naskiriye û enerjî û dema xwe ji bo belavkirina fikirê vê tevgerê veqetand û di nava gel de kar û xebata siyasî û rêxistinî kir. Apê Îsmaîl di pêvajoya têkoşîna de ji binçavkirin û tepeserkirinê bê par nemaye, lê tevî vê yekê têkoşîna xwe berdewam kir û mala xwe kir cihê birêvebirina civînan.

Apê Îsmaîl gelek caran bi Rêber Abdullah Ocalan re civiya, lewma hîn jî perspektîfên hevdîtina carekê di bîra apê Îsmaîl de maye û wiha par ve dike, rêbertî bal dikişand ser girîngiya berdewamiya têkoşînê û divê tu kiryar nikaribe vîn û israra we bişkîne.

Dema çeteyan 2013`an êrişî taxa Şêxmeqsûdê kirin, şêniyan bi rêya avakirina komînan û meclisan xwe birêxistin dikirin û apê Îsmaîl di navakirina Meclisa Malbatên Şehîdan de xwedan rol bû.

XITYARÎ LI PÊŞIYA TÊKOŞÎNA WÎ NEBÛ KELEM

Derbarê kar û xebata di Meclisa Malbatê Şehîdan de apê Îsmaîl axivî û wiha got: "Min tu carî xityarî ji bo berdewamiya têkoşînê xwe nekir asteng, ji ber rêbertî domdar îşaret bi armancê dikir, lewma rêbertî ji bo min jêdera hêzê bû û bi vî awayî min temenê xwe yê mayî ji bo belavkirina felsefeya rêbertî veqetand."

Apê Îsmaîl wiha axaftina xwe bi dawî kir: " Kar û xebata ku dikin di oxira azadiya gelê Kurd ye, heke yekîtiya kurdan çêbibe ew ê bi ser bikevin. Lewma divê her kes bi erka xwe rabe û azadiya xwe misoger bike."

(eh)

ANHA