Cenazeyê şehîd Idrîs li Tebqayê hate veşartin

Şervanê Hêzên Sûriya Demokratîk (QSD) Mecîd Filêc (Idrîs) duh di encama teqîna mayîna çeteyên artêşa Tirk a dagirker li derdora navçeya Eyn Îsayê bi cih kiribûn, şehîd bû. Cenazeyê şehîd Idrîs bi merasîmeke girseyî li goristana Şehîdan a Tebqayê hate veşartin.

Bi sedan şêniyên herêma Tebqayê cenazeyê şehîd Idrîs ji ber nexweşxaneya Wetanî wergirtin û bi kerwanekî ber bi goristana Şehîdan ve ketin rê.

Li goristanê merasîmeke leşker ji aliyê şervanên QSD‘ê ve destpê kir. Hevserokê Meclisa Malbatên Şehîdan Mûsa El-Osman serasxî ji malbatên şehîdan re xwest û got: "Şehadet berê û niha tekane pîvana her şoreşger û têkoşerekî azadîxwaz e."

Bi navê Meclisa Leşkerî ya Tebqayê Umer Îsmaîl anî ziman ku şervanên QSD‘ê dê têkoşîna xwe li hember dagirker û gefên li ser destkeftiyên şehîdan bidomînin.

Cîgira hevserokatiya Meclisa Rêveber a Herêma Tebqayê Zehra Arden ev tişt got: "Bi vî şehîdên û şehîdên berê wî em îro li vir kom bûne. Şehîd wê hertim di bîra me de zindî be."

Rêvebera Meclisa Malbatên Şehîdan Fatima El-Elî nasnameya şehîd xwend û radestî malbata wî kir.

Şêniyan cenazeyê şehîd di nava dirûşme û tilîliyên dayikan spartin axê.

ANHA