Li Qamişlo civîna ji bo yekîtiya netewî

Ji destpêka aloziya Sûriyê ve, ji bo misogerkirina mafên gelê Kurd di pêşeroja Sûriyê de û ji bo rê li pêşiya lîstina aliyên herêmî û navdewletî bi çarenûsa gelê Kurd were girtin, hin aliyên kurdî li Sûriyê hewl didin ku refa kurdî û xîtaba siyasî bikin yek. Di çarçoveya van hewldanan de însyatîfa Komîteya Kongreya Nîştimanî ya Kurdistanê KNK û însyatîfa fermandarê giştî yê Hêzên Sûriya Demokratîk Mazlûm Ebdî, pêk hat.

Ji bo bi cihanîna bang û însyatîfa Hêzên Sûriye Demokratîk her wiha ji bo gihîştina çareserî û biryarên xizmeta doza kudî dikin, îro Partiya Kesk a Kurdistanê û Yekitiya Hêzên Kurdî li Rojava li navenda Partiya Kesk li bajarê Qamişlo bi hev re rûniştin.

Di 25`ê Tebaxa sala borî de 5 partiyên siyasî yên kurdî li Bakur û Rojhilatê Sûriyê di bin navê " Yekitiya Hêzên Kurdî-Rojava"de, bi daxuyanekê hevgirtina xwe ragihandin. Partiya Biratiyê Ya Kurdistanê, Partiya Demokratîk a Kurdistanê-Sûriyê El-Partî, Partiya Yekitiya Nîştimanî Ya Azad, Partiya Tekoşînê ya Demokratîk, Partiya Komarî Ya Kurdistanê û komeke kesên serbixwe, di yekitiyê de cih digirin.

Ev civîn piştî serdana berpirsên Yekitiya Hêzên Kurdî-Rojava ya ji buroya Partiya Kesk a Kurdistanê re pêk hat. Di civînê de berdevkê Yekitiya Hêzên Kurdî-Rojava Ebd El-Kerîm Siko, seroka Partiya Tekoşînê ya Demokratîk Xunav Mela û serokên Partiya kesk a Kurdistanê Luqman Ehmê tevî hejmareke endaman amade bûn.

Beşdarên civînê mijara sereke ku yekitiya nîştimanî ya kurdî û çawaniya pêkanîna wê, nîqaş kirin.

Her wiha tekez kirin ku girînge li dijî aliyên ku banga gelê kurd a yekitiya nîştimanî bi cih naynin, helwesteke cidî û dawî were giritn û hesab ji wan bê xwesetin. Her wiha partiyên ku bi awayekî zelal tev li vê însyatîfê nabin bên teşhîrkirin û ev yek ji gel Kurd re bê şîrovekirin.

(şx)

ANHA