Di çilrojiya komkujiya Til Rifetê de li Şehbayê meşek hate lidarxistin 

Di çilrojiya komkujiya Til Rifetê de ku di 2`yê Kanûnê de ji aliyê dagirkeriya Tirk ve pêk hat, bi hezaran koçber û zarokên kantona Şehba û Efrînê li navçeya Fafînê kom bûn.

Di meşê de çiqilên darên zeytûnê û gul, her wiha wêneyên şehîdên komkujiyê û pankartên "Bi komkujiyên we, hûn nikarin xeyalên pêşeroja me bi dawî bikin" hildan.

Meş ji rêya sereke li navçeya Fafînê dest pê kir û ber bi goristana şehîdan a navçeyê ve çû û dirûşmên silavkirina berxwedana şêniyên Efrînê û Berxwedana Serdemê hatin berzkirin. Li goristanê, daxuyaniyek bi zimanên kurdî û erebî ji aliyê xwendekar Zeyneb Lolo û Şehama Reşîd ve hate xwendin.

Di daxuyaniyê de ev tişt hate gotin: "Îro û di çilrojiya komkujiya Til Rifetê de ku ji aliyê dewleta Tirk a dagirker û çeteyên wê ve pêk hat û di encama wê de bi dehan şehîdên sivîl ji wan 8 zarokên ku gunehê wan tune bû, şehîd bûn. Dîktatorê serdemê yê hovane Erdogan ku xwîna zarokên Şengalê, Roboskî, Nisêbîn, Efrîn û Serêkaniyê vexwar, komkujiya dawîn li dijî zarokên Til Rifetê pêk anî.

Tirkiyê di êrişan li ser gelê hezkiriyên azadiyê de pêk tîne û cihên wê yên dîrokî talan dike.

Bi navê zarokên Efrînê û Şehbayê û taybet zarokên şehîd, em komkujiya Til Rifetê û hemû binpêkirinên der heqê zarokan de şermezar dikin û daxwaz ji bangxwazên azadî û demokrasiyê ji rêxistinên mafnas ku parastina zarokan dikin û taybet UNCEF`ê dikin ku bi erka xwe rabe û zextê li dewleta Tirk a faşîst bike da ku ji xaka me derkeve û aştî belav bibe û şer bi dawî bibe.

Na ji kuştina zarokan re, na ji dagirkeriyê re, erê ji vegera li Efrînê re."

Paşê zarokan gul li ser gorên her 8 zarokên ku şehîd bûbûn, danîn. Meş bi dirûşmên silavkirina berxwedanê bi dawî bû.

(jo)

ANHA