‘Em dikanên xwe bigirin jî em malên Tirkî nakirin‘

Li hemberî êrişên dagirkerî yên dewleta Tirk ên li ser herêmên Bakur û Rojhilatê Sûriyê, bazirganên mezin ên bajarê Qamişlo jî bertek nîşan dan û biryar dane kelûpel û berhemên Tirkî baykot bikin.

Artêşa Tirk a dagirker, di 9`ê Cotmeha borî de dest bi êrişên xwe yên li ser herêmên Bakur û Rojhilatê Sûriyê kir, bi nav êrişan tevahî qanûnên nevdewletî binpê kirin, sûcên giran der heqê sivîlan de pêk anîn û herdu bajarê Serêkaniyê û Girê Spî dagir kirin û şêniyên herdu bajaran dane koçberkirin.

Li hemberî êrişên dewleta Tirk, çalakvanên Başûrê Kurdistanê dest bi hemleya baykotkirina kelûpelên Tirkî kirin. Kampanya baykotkirinê berfireh bû û gelek dewletên Erebî û Ewrupî belav bû.

Kampanyaya bi navê `` Kelûpelên Tirkî baykot bikin`` a ji aliyê xwendekarên zanîngeha Rojava ve bi rêve diçe, di nava civakên herêmên Bakur û Rojhilatê Sûriyê de bi awayekî berfireh cih girt.

Bazirganên mezin ên bajarê Qamişlo di vê çarçovê de, diyar  kirin ku wan kelûpelên Tirkî baykot kirine û dê li şûna wê kelûpelên Sûrî bi kar bihînin.

Li kolanên bajarê Qamişlo û cihên giştî, pankartên bi nivîsên`` Kelûpelên Tirkî baykot bikin`` û ``Xwe bi pareyên xwe nekujin`` hatine daliqandin, li kêlekê wêneyê zarok Mihemed ê bi çekên qedexekirî ya Fosfora Spî ya artêşa dewleta Tirk a dagirker hatiye birîndarkirin, hatiye danîn.

Bazirganê firotina madeyên xwarinê ya navîna bazarê bajarê Qamişlo, Hacî Nûrî Enter di vê derbarê de got:`` Ez ji birçîna bimrim jî, kelûpelên Tirkî neînim dûkana xwe.``

Hacî Enter da xuyakirin ku``Dewleta Tirk dijminatiya me dike, em jî ne mecbûrin bazirganiyê bi kelûpelên wê bikin û aboriya wê bihêz bikin, ew dewleteke zordest û dagirker e,  nirx û pîvanên mirovahiyê jî li ba wê tuneye.``

Hacî Enter têkildarî peydakirina kelûpelan, piştî ku kelûpelên Tirkî baykot kirin got:`` Em ê kelûpelên xwecihî bînin, ger kelûpelên xwecihê nehatin peydakirin tu carî kelûpeklên Tirkî nakirim, neçar bibim ez ê dûkana bazirganiyê bigrim.``

Bazirganekî din ê madeyên xwarinê, Enes El-Şêx ev tişt anîn ziman:`` Her kes dizane ji bo çi me kelûpelên Tirkî baykot kirine, em li şûna keûpelên Tirkî, kelûpelên Sûriyê datînin. Neçar bimînim ez ê dukanê bigirim û malên Tirkî nakirim.``

Yasir Ebdulcelîl ku bazirganekî mezin e, da xuyakirin wan berê kelûpelên Tirkî di anîn û li dûkanên bazirganiyê yên madeyên xwarinê belav dikirin û wiha got:" Piştî êrişên dagirkerî yên dewleta Tirk û zulma li ser gelê me pêk anîye taybet gelê Kurd, em careke din kirîn û fortina kelûpelên Tirkî nakin.``

(rr)

ANHA