Şêniyên Kobanê şehîdên Berxwedana Rûmetê oxir kirin

Bi sedan şêniyên Kantona Kobanê cenazeyên 5 şehîdên Berxwedana Rûmetê ya bersivdana êrişên artêşa dewleta Tirk a dagirker û çeteyên wê de şehîd bûne, li Gorsitana Şehîd Dîcle oxir kirin.

NÛÇE

11 mijdar, 2019 16:28

KOBANÊ

Girseya gel a bajarê Kobanê îro beşdarî merasîma oxirkirina cenazeyê 5 şehîdên ji şervanên QSD`ê û YPJ`ê bûn, ku di nava Berxwedana Rûmetê de şehîd bibûn.

Navê her 5 şehîdan wiha ye:``Botan Remedan (Têkoşer Rojava), Esmer Hemo (Peyman Kobanê), Bêrîvan Mistefa (Hesret Kobanê), Zeyneb Kecar (Rewan Çinar) û Ehmed Ebdulrehman (Rodîê Reqa).

Merasîm bi deqeyeke rêzgirtinê dest pê kir, paşê cîgirê Hevserokatiya Meclîsa Firatê Hesen El-Şêx û endama rêveber a Kongra Star Letîfe Silêman axivîn û ji malbatên şehîdan re sersaxî û aramî xwestin.

Di axaftinan de rola şehîdan bilind hate nirxandin û hat gotin ku şehîd, şehîdên netewa Demokratî, şeref û rûmetê nin, ji bo parastina gelê xwe li dijî artêşa deleta dagirker a Tirk û çeteyên wê şehîd bûn, da ku rê nedin xaka Sûriyê were dagirkirin.

Malbatên şehîdan jî di çarçoveya merasîmê de soz dan, rêya têkoşîn û berxwedanê, rêya şahîdan bişopînin heta ku serkeftin were pêkanîn.

Paşê wesîqeya şehîdan hate xwendin û radestî malbatan hate kirin, di nava tilîliyên dayikan û durişmên dilsoziya bi şehîdan re, cenaseyê şehîdan li goristana Şehîd Dîcle, hatin veşartin.

(rr)

ANHA