Sebrî Mustafa: Bang li rêxistinên mirovî kir ku alîkariya koçberên Girê Spî bikin

Êrişên hovane yên artêşa Tirk a dagirker li ser herêmên Bakur û Rojhilatê Suriyê bûn sedem ku bi hezaran malbat ji bajarê Girê Spî û gundewarên wê koçber bibin. Dewleta Tirk a dagirker malên sivîlan bê ser û ber û bêyî ferqê têxe navbera sivîl û leşkeran de, topbaran kirin. Di emcamê de bi hezaran malbat ji cih û warên xwe koçber bûn û bi hatina demsala zivistanê re jiyaneke zehmet li eraziyan deras dikin.

 Beşek ji koçberan li gundên navçeya Çelebiyê ya li rojhilatê bajarê Kobanê dimînin û yên din jî li gundên navçeya Eyn Îsa, Reqa û gundewarên wê û Tebqayê dimînin.

Cîgirê Hevserokartiya Meclisa Kantona Girê Spî Sebrî Mustafa têkildarî mijarê got: "Koçber ji ber sermayê, tunebûna pêdiviyên sereke yên jiyanê û kêmbûna madeyên xwarinê,  gelek êş û azaran dikşînin, taybet jî zarok, kal û pîr.

 Li gorî serjimarya ku hatiye çêkirin, Sebrî diyar kir ku tenê li bajarê Reqa û gundewarên wê 40 hezar koçber hene û got ku koçber di malên ku di dema rizgarkirina bajêr ji çeteyên DAIŞ`ê de hatine wêrankirin, jiyan dikin.

Sebrî di dewama axaftina xwe de got: " Tevî hevkariya Rêveberiya Xweser a Bakur û Rojhilatê Suriyê amadekariya avakirina kampekê ji koçberên Girê Spî re li bajarokê Til Seminê dikin, lê ji ber mercên şer û dorpêçê derfet gelekî kêm in û ev jî têrê nakin ku daxwazên koçberan bicih bînin."

Sebrî Mustafa bang li rêxistinên mirovî yên herêmî, cîhanî û navdewletî kir ku alîkariyên pêwîst ji koçberên Girê Spî re pêşkêş bikin û kampekê ji bo parastina sermaya zivitanê, ji wan re vekin.

ANHA