Stasyona ku 25 hezar donim erd av dide, sererast bû

Piştî xebata 3 mehan Komîteya Çandiniyê ya Meclisa Gel a Hecînê stasyona avdaniyê ku 25 hezar donim zeviyên çandiniyê av dide, sererast kir.

17 îlon, 2019 10:11

DÊRAZOR

Bi alîkariya Meclisa Sivîl a Dêrazorê, Komîteya Çandiniyê ya bajarokê Hecînê stasyona avdaniyê li bajarok sererast kir.

Stasyon, tekane stasyon e ku li bajarok dixebite, 25 hezar donim zeviyên çandiniyê yên Hecînê av dide, lê zeviyên din bi rêya jeneratorên taybet ên li ser bîrên avê tên avdan.

Stasyon 2 salan xirabe bû, vê yekê bandoreke neyînî li jiyana şêniyan dikir, her wiha çeteyên DAIŞ`ê jî nedihişt bê çêkirin. Lê piştî rizgarkirina herêmê, Meclisa Sivîl a Dêrazorê gelek destkeftiyên di aliyê xizmetguzarî û çandiniyê de pêk anîn.

Hevserokê komîteyê Cindî Temê got di stasyonê de 6 defiş hene, dê 3 defiş rojane 3 saetan bixebitin, paşê bê girtin û dest bi bikaranîna 3 defişên din bikin.

Hêjayî gotinê ye ku zeviyên çandiniyê li Hecînê 85 hezar donim in, jê 25 hezar donim ji stasyona ku hate sererastkirin tê avdan û xebata sererastkirina stasyonan ji bo avdana hemû zeviyên Hecînê didome.

(jo)

ANHA