Rêveberiya Xweser rewşa dibistanan dişopîne

Bi armanca şopandina rewşa perwerdeyê li dibistanan, îro şandeyek ji Rêveberiya Xweser a Bakur û Rojhilatê Sûriyê serdana gelek dibistanên bajarê Qamişlo kir.

NÛÇE

17 îlon, 2019 09:33

QAMIŞLO

Îro şandeyek ji Rêveberiya Xweser ji hevserokê Meclisa Rêveber a Rêveberiya Xweser a Kantona Cizîrê Tilet Yûnis, hevseroka Desteya Perwerde û Fêrkirinê ya Herêma Cizîrê Semîra Hec Elî serdana gelek dibistanên bajarê Qamişlo kir.

Şandeyê rewşa dibistanan, mamosteyên ku xebata perwerdeyê dikin û zehmetiyên ku beramberî wan tên, şopandin.

Hevseroka Desteya Perwerde û Fêrkirinê ya Herêma Cizîrê Semîra Hec Elî wiha got: "Armanca serdanê ew e ku bi destpêkirina sala nû ya xwendinê rewşa perwerdeyê bibînin û zehmetiyên ku beramberî saziyên perwerdeyê ji kêmbûna pirtûkan, çapkirina pirtûkan û ferzkirina mamosteyan li gorî beşên wan derbas bikin."

Rêveberiya Xweser û desteyên wê, di demeke kurt de karekî mezin di aliyê perwerde û fêrkirinê de pêk anî, branşên xwendinê ji xwendekarên amadehiyê re amade kirin, her wiha gelek peymangeh, akademî û zanîngeh li tevahiya Bakur û Rojhilatê Sûriyê vekirin.

Li herêma Cizîrê 230 hezar û 489 xwendekar li 2 hezar û 225 dibistanên seretayî, navîn û amadehî dixwînin.

(jo)

ANHA