Şênî li ser sînor dagirkeriya dewleta Tirk red dikin

Li gundê Qeremox ê rojhilatê Kobanê û gundê Ziyaret ê rojavayê Kobanê çalakiyên mertalên zindî li ser sînorê Sûriye-Tirkiyê berdewam in. Çalakiya bi armanca şermezarkirina gefên Tirkiyê yên li ser herêmên Bakur û Rojhilatê Sûriyê, di roja xwe ya 13`an de ye. 

Şêniyên kantona Kobanê, şandeyên ji gelek herêmên Bakurê Sûriyê yên wekî Reqa, Minbic û Tebqayê beşdariya çalakiya mertalên zindî bûn ku di 17`ê Tîrmehê de li gundê Qeremox dest pê kiribû. Di heman demê de li gundê Ziyaretê jî di 19`ê Tîrmehê de û li Girê Spî di 18`ê Tîrmehê de çalakiyan dest pê kiribû.

Di roja 13`an a çalakiyê de berdevka Desteya Jinan a bajarokê Til Xezal ê Kobanê Îslem Elî axivî û got: "Di roja 13`emîn de em çalakiya xwe li dijî gefên dewleta Tirk li ser sînor berdewam dikin, heke pêwîst bike em ê heta 13 salan li dijî gefên ku metirsiyê li ser ewlehiya herêmê çêdikin, çalakiyên xwe tenê ji bo hemû pêkhateyên Bakur û Rojhilatê Sûriyê bi aramî bijîn, berdewam bikin."

Şêniyan jî tekez kir ku ew li Bakurê Sûriyê bi aramî dijîn, lê Tirkiye behsa êrîşên li ser herêmê dike û civaka navdewletî beramberî vê yekê bê deng e.

Çalakiyên mertalên zindî berdewam in û şênî destnîşan dikin ku heta Tirkiye dawî li gefên xwe yên li ser herêmê bîne, ew ê çalakiyên xwe berdewam bikin.

(eh)

ANHA