‘Eger hikumeta Başûr helwest hebûya, dê çarenûs ne mirin bûya’

Dewleta Tirk a dagirker li gel bêdengiya hikumeta herêma Başûrê Kurdistanê û ya Iraqê, êrîşên xwe yên li ser xaka Başûrê Kurdistanê berdewam dike.

Şêniyên navçeya Dirbêsiyê ya kantona Hesekê êrîş şermezar kirin û bang li hikumeta Başûrê Kurdistanê û Iraqê kirin ku li hemberî êrîşan helwest nîşan dibin.

Şêniyê bi navê Mihemed Elî tekez kir ku armanca Tirkiyê ji êrîşên li dijî Başûrê Kurdistanê ew e ku gelê Kurd qir bike, dîrok û çanda wî sîl bike. Elî wiha domand: "Lê em nahêlin ku dewleta Tirk komkujiyên din pêk bîne û em dê li dijî wan êrîşan bisekinin."

Elî bang li hikumeta Iraq û Başûrê Kurdistanê kir ku helwestên xwe li hember van êrîşan nîşan bidin, ji ber ku ev êrîş gelê Kurd, gelê Iraqê û serweriya Iraqê dike armanc.

Şêniyê bi navê Azad Remo got: "Divê gelê Kurd yekrêziya xwe ava bikin, ji bo berjewendiya xwe kar bikin, dûrî berjewendiya partiyetî û kesayetî kar bikin."

Şêniyê bi navê Îmad Eyo balkişand ser dagirkeriya Tirk ku sivîl û zarokan li ber çavên hikumeta Başûrê Kurdistanê dikoje û wiha domand: "Ji ber wê em bang li hikumeta Başûr dikin ku helwesta xwe diyar bike. Rê li pêşiya binpêkirinên dagirkeriya Tirk bigire. Dest ji berjewendiyên xwe berde û bi berjewendiya gel û çaranûsa gel bifikire."

Şêniyê bi navê Ednan Elîwan jî got: "Eger hikumeta Başûrê Kurdistanê helwestek pêwîst li dijî van êrîşan nîşan bidaba, wê demê dê çaranûsa gel ne mirin bûya."

(şx/bm)

ANHA