Hêzên rejîma Sûriyê gundê Hemamiyat xist bin serweriya xwe

Piştî topbarana bejahî û hewayî ya dijwar û bi êrîşa hêzên rejîmê re ku 8 caran têk çû û ya 9`an bi ser ket, hêzên rejîmê gundê Hemamiyat û girê wê yê stratejîk ê bejahiya bakurê rojavayê Hemayê piştî ku roja Çarşemê çeteyan girtibû, xist bin serweriya xwe.

Li eniya gund heta niha topbarana bi moşekan û şerê bi çekên giran didome. 

Navenda Çavdêriya Mafên Mirovan a Sûriyê diyar kir ku di encama şer de ku nêzî 30 saetan dewam kir, gelek sivîl hatin kuştin. 67 endamên hêzên rejîmê di encama şerê li eniyên Hemamiyat ê bakurê rojavayê Hemayê de ji şevê din û heta van kêliyan her wiha 56 çeteyên ku destekê ji dewleta Tirk a dagirker werdigirin, hatin kuştin.

Girêdayî mijarê balafirên Rûsyayê ji şevê din û heta van kêliyan 12 caran Xan Şêxûn a bejahiya başûrê Idlibê, Kefer Zîta, Cebîn ê bejahiya bakur û bakurê rojavayê Hemayê, her wiha balafirên şer îro di saetên sibê de 7 caran derdora bajarê Mereta Naman, bajarokê Kefer Zîta bombebaran kirin. Helîkopteran jî bermîlên teqemeniyê avêtin ser bajarokê Kefer Zîta yê bakurê Hemayê. Hêzên rejîma Sûriyê zêdeyî 240 moşek û top avêtin herêmên Xan Şêxûn ên bejahiya başûrê Idlibê, Cebîn, Til Milih û Cîsat ê bejahiya Hemayê.

Bi vê yekê hejmara kesên ku ji destpêka şerê li herêmên bê çek hatine kuştin bû 2 hezar û 420 kes.

(bx)