Piştî rizgarkirinê Ermenên Girê Spî dîsa azad bûn

Çeteyên DAIŞ`ê piştî ku herêmeke berfireh ji Iraq û Sûriyê dagir kir, yek reng li ser tevahî niştecihên herêmêm ku bi pirrengiya xwe dihatin naskirin ji Kurd, Ereb, Ermen û Asûran ferz kirin.

Ev siyaseta çeteyên DAIŞ`ê, azadiya hinek pêkhate û civakên ku olên wan ji şeklên ku DAIŞ`ê li ser herêmê ferz kiribûn cuda bû, hat astengkirin.

Pêkheteyên Ermen ên Girê Spî ya li ser sînorê Tirkiyê – Sûriyê ku DAIŞ`ê 2 salan dagir kir, mînaka herî berbiçav bû.

Çeteyên DAIŞ`ê tekane dêra ermenan ku rê û resmên xwe lê pêk dianîn, girt. Çeteyan ew dêr ji xwe re kir nuqteyeke leşkerî.

Dêra ku di sala 1924`an de hatiye avakirin, ji cihê pêkanîna rê û resmên xiristiyanî veguherî girtîgeh û dibistana ku çêkirina mayinan lê dihat fêrkirin ku ji ber wan bi dehan sivîl hatin kuştin.

Çeteyên DAIŞ`ê hemû sembol û wêneyên di dêrê de şewitandin. Her wiha xaça ku li jora dêrê hatibû danîn, rakirin. Nedihiştin ku ermen biçin dêrê û rê û resmên xwe yên olî di hundirê wê de pêk bînin.

Diviya ku Ermenên li herêmê mabûn, pereyan bidin an koçber bibin an jî qanûnên çeteyên DAIŞ`ê ji neçarî qebûl bikin.

Lê piştî Girê Spî 15`ê Hezîrana 2015`an ji aliyê Yekîneyên Parastina Gel û Yekîneyên Parastina Jin (YPJ/YPG) ve hat rizgarkirin, careke jiyan li herêma ku çend salan bûbû cihê kombûna terorîstên ku ji tevahî cîhanê hatibûn, vegeriya. Ev herêm korîdora ku çeteyan bi rêya wê çek û cebilxane ji Tirkiyê ber bi Sûriyê û Iraqê ve dibir.

Ermenên herêmê dîsa bûn mîna Kurdên ku ji ber çeteyên DAIŞ`ê ji Girê Spî koçber bûbûn û tev li rêveberiya herêmê ku ji aliyê Rêveberiya Xweser ve hat avakirin, bûn.

Di Cotmeha 2018`an Ermenan dîsa dêra xwe bi derfetên xwe vekir, xaç dîsa li ser dêrê hildan û bi vê yekê dest bi pêkanîna rê û resmên xwe yên olî piştî çend salan kirin.

Soniya Sanosiyan ji pêkhateyên Ermen ên kantona Girê Spî ye, di vê derbarê de wiha got: "DAIŞ`ê kiryarên herî qirêjî li dijî me û ola me pêk anîn. Em bi darê zorê misilman kirin. Ji ber ku ew dibînin ku ola xiristiyanî ola gawiran e."

Soniya tekez kir ku çeteyên DAIŞ`ê hemû sembolên di dêrê de rûxandin, hemû tiştên wê şewitandin û kirin girtîgeh.

Her wiha Soniya destnîşan kir ku piştî rizgarkirina bajêr ji aliyê şervanên YPJ/YPG`ê ve û bi saya Rêveberiya Xweser û pêkhateyên Ermen dêr vegeriya mîna berê, hemû rê û resmên olî di dêrê de têne pêkanîn û beşek ji bo fêrkirina zimanê ermenî jî heye.

Îro piştî 4 salan ji rizgarkirina Girê Spî pêşketin û guhertinên herêmê di hemû aliyên perwerde, fêrkirin, çandin û şeklê rêveberiya kantonê de berbiçav e.

(bx)

ANHA