Bi armanca darizandina DAIŞ’ê li Bakurê Sûriyê kampanyaya îmzeyan dest  pê kir

Di sala 2014`an de çeteyên DAIŞ`ê bi alîkariya dagirkeriya dewleta Tirk bi êrîşeke hovane  ketin bajarê Kobanê, hemû cureyên şîdet û îşkenceyê li şêniyan kirin.

Lê piştî berxwedaneke bêhempa ji aliyê welatiyên Kobanê û şervanên YPJ û YPG`ê ve cara yekemîn bû ku çeteyên DAIŞ`ê di Kobanê şikestin, herî dawî jî li gundê Baxozê li Rojhilatê Dêrazorê di aliyê erdnîgarî de têk çûn.

Bi hezaran çeteyên DAIŞ`ê di girtîgehên QSD`ê de hene, ji bo darizandina wan li Bakur û Rojhilatê Sûriyê, ev hefteyek e Meclisa Malbatên Şehîdan a Kobanê dest bi pêngava komkirina îmzeyên malbatên şehîdan kiriye û di 2 rojên din de kampanya dê bi dawî bibe.

Ednamê Rêveberiya Meclisa Malbatên Şehîdan a Kantona Kobanê Silêman Silêman der barê mijarê de ev tişt got: "Armanca me ji komkirina îmzeyan ew e ku çeteyên di girtîgehên QSD`ê yên li Bakur û Rojhilatê Sûriyê de li wir û taybet li ser axa Kobanê bên darizandin, têkçûna DAIŞ`ê ji Kobanê dest pê kir, divê li Kobanê jî dadgehek bê damezirandin."

Silêman diyar kir ku pêngava wan ji Reqa, Tebqa, Minbic, Dêrazor, Kobanê û di nav şêniyên Efrînê yên li Şehbayê de dewam bike, dê dengên malbatên şehîdan kom bikin.

Her wiha endamê rêveberiya meclisê destnîşan kir ku ew ê piştî komkirina îmzeyan, bişînin Saziya Mafên Mirovan û Neteweyên Yekbûyî. Silêman di dawiya axaftina xwe de bang li hêzên navneteweyî kir û got: "Em bang li hêzên navneteweyî û NY`ê dikin û dibêjin em parêzvanên mafên mirovan in û di zûtirîn demê de daxwaza me erê bikin û dadgeheke navneteweyî ava bikin."

(hk)

ANHA