Li Til Hemîsê ji ber barana dijwar ziyan gihaşt mal û sewalan

QAMIŞLO

Duh baraneke dijwar li herêma Cizîrê bariya, ji ber vê yekê lehî  li tevahiya herêmên başûrê herêma Cizîrê rabû, bi dehan ji malên şêniyan hilweşiyan û bi sedan şênî ji tirsa ku lehî li newala El-Cerha ya navçeya Tirbesipiyê rabe, ji malên xwe derketin.  

Ji ber vê yekê şêniyên navçeya Tirbespiyê û başûrê Til Hemîsê şeveke nerehet derbas kir.  Duh bi şev di nava metirsiyekê de bûn, di vê derbarê de hinek ji şêniyan metirsiya ji baranê û bilindbûna pêlên lehiyê anîn ziman û bang li aliyên peywendîdar kir ku alîkariya şêniyên ku rastî lehiyê hatine, bi taybet Newala El-Cerha bikin. 

Şaredariya Gel li navçe û şaredariyên girêdayî wê bê navber kar dike û hewl dide metirsiya rabûna  lehiya li bendavên Çilaxa û Newala  El-Cerha bi taybet gundên Akaşa, Sivana, El-Hesewiyê, Wawiyê, El-Cîsî, El-Henwa, El-Zerqa, El-Qadisiyê, Xiwêtilê, Farisok, Xirbet Amir, Belqîs, El-Ferhaniyê, El-Milêhiyê û El-Hemdo  kêm bike.

Di heman demê de, pirên rêya di navbera Rêya Petrolê de, wekî pira El-Hemdo, pira El-Kelî, pira Wawiyê ya li navçeya Til Hemîsê rastî ziyanan hatine.

Ji dîmen û wêneyên ku nûçegihanên me ji navçeya Til Hemîsê kişandine, diyar dibe ka çi qas barana dijwar ziyan gihandiye malan û bûye sedema girtina rêyan û çêbûna golên avê.

(ekîb)

ANHA