Di Berxwedana Serdemê de wek şehîd hatin ragihandin lê hîn dijîn

FÎDAN ABDULLAH / EFRÎN

Her du şervanên YPJ/YPG`ê Avrîn Masûm û Şoreş Amûdê tev li qonaxa yekemîn a Berxwedana Serdemê bûbûn. Her du şervan li eniya gundê Elbîsê yê girêdayî navçeya Raco ya kantona Efrînê bûn.

27`ê Çileya 2018`an li wî gundî di navbera şervanê YPJ/YPG`ê û artêşa Tirk a dagirker û çeteyên wê de şerek dijwar derket. Şervana bi navê Avrîn tev li berxwedana li dijî êrîşên artêşa Tirk a dagirker û çeteyên wê bûbû. Ji ber ku Avrîn endama Navenda Ragihandin û Çapemiyê ya YPJ`ê bû, bi kamereya xwe berxwedan belge dikir. 

Ji ber berxwedana mezin a şervanan li dijî êrîşên artêşa Tirk a dagirker û çeteyên wê, çeteyan nikaribû bi pêş de biçin. Ji ber wê artêşa Tirk a dagirker û çeteyên wê herêm bi balafir û çekên giran topbaran kir. Tevî wê jî şerê dijwar dewam kir. Di nava şer û topbaranê de, topek nêzî cihê şervanan ket. Di encamê de Avrîn ji lingê xwe birîndar bû û lingê wê şewitî. Her wiha şervanê bi navê Şoreş bi parçeyan birîndar bû.

Piştî her du şervan birîndar dibin, nikarin tev bigerin. 5 rojan bi awayekî veşartî di gund de dimînin. Di wan rojan de topbaran li ser gund û derdorê dewam dikir û mal hatin rûxandin.

Pitşî ku li gund bêdengî çêbû û topbaran sekinî, her du şervan serzikî çûn û ji gund derketin. Xwe di cihekî baş de veşartin. Ji ber tu alavên ragihandinê bi wan re tune bûn, nikarîbûn bi hevalên xwe re bikevin nav têkiliyê.

Fermandariya Giştî ya YPJ/YPG`ê tu agahî ji wan her du şervanan wernegirtin. Fermandariyê her du di 30`ê Çileya 2018`an de bi merasîmekê, şehîd îlan kirin.

Her du şervan li xeta herêma di navbera şervanên YPJ/YPG`ê û artêşa Tirk a dagirker û çeteyên wê de xwe di nava darên zeytûnan de veşart. Her du şervanan ava baranê vedixwar û pelên daran dixwarin. Her du şervan birîndar bûn, tevî birçîbûn û tîbûnê jî morala xwe nexist. Baweriya wan hebû ku hevrêyên wan dê wan rizgar bikin, ji ber wê îrade û israra wan zêde bû.

Di 24`ê Sibata 2018`an roja 35`an a Berxwedan Serdemê û piştî 26 rojan ku agahî ji her du şervanan nehat girtin, şervanên YPJ/YPG`ê li gundê Elbîskê li dijî artêşa Tirk a dagirker û çeteyên wê çalakî pêk anîn. Her du şervanan dengê guleyan bihîstin û dema çalakî dîtin zanîn ku li gund şer heye. Dema şervanên YPJ/YPG`ê di ber cihê ku her du şervanan xwe tê de veşartibû re derbas dibin şervanê bi navê Şoreş bang dike "Em hevalên we ne û em dijîn." Şervanan dengê Şoreş bihîst û bi hişyarî ber bi cihê ku deng jê derket ve, çûn. Dema ku gihîştin wî cihî dîtin ku her du şervan ji birçîbûn, tîbûn û êşa birînên xwe pir westiyane.

Şervanên YPJ/YPG`ê yên ku li dijî artêşa Tirk a dagirker û çeteyên wê çalakî pêk anîn, her du şervanên birîndar Avrîn û Şoreş rakirin û ber bi cihekî ewle ve birin. Şervanan ew derman kirin.

Her du şervanan got vegera wan "zayîneke nû” ye. Her wiha teqez kirin ku tişta hatiye serê wan, îrade û hêza wan ji bo berdewamkirina berxwedanê zêde kir.

Îro jî piştî birînên her du şervanan rehet bûne, li nava refên YPJ/YPG`ê vegeriyane. Niha jî bi hevrêyên xwe re xebatên xwe didomînin.

(bx/bm)

ANHA