Meclisa Rêveber mekanîzmeya çareserkirina pirsgirêka kêmbûna sotemenê dinirxîne

GIRÊ SPÎ

Ji bo nîqaşkirina mijara kêmbûna sotemenê û gazê û rêbazên peydakirina wan madeyan ji şêniyan re bi buhayên guncew, Meclisa Rêveber a Rêveberiya Xweser a Bakur û Rojhilatê Sûriyê di civîna 5`ê vê mehê de bi hevserokatiya Meclisên Rêveber ên rêveberiyên xweser û sivîl  ku 7 in ev komîte ava kiribû.

Bi armanca nirxandina vê mijarê , Meclisa Rêveber îro civînek li navenda Desteyên Rêveberiya Xweser a navçeya Eyn Îsayê ya Kantona Girê Spî lidar xist. Di civînê hevserokê Meclisa Rêveber a Rêveberiay Xweser Ebid Hamid El-Mihbaş, cîgirên hevserokatiyê Êlîzebith Gewriyê, Rohilat Arif û Ferhad Şiblî, endamên komîteya têkildarî mijara kêmbûna madeyên sotemeniyê û gazê amade bûn.

Di civînê de beşdaran mekanîzmeya belavkirina sotemeniyê li şêniyan û her du beşên giştî û taybet, sedemên kêmbûna sotemenî û asta bandora wê li ser şênî, cotkar û pîşyeyan nîqaş kirin.

Her wiha di civînê de beşdaran astengiyên û pirsgirêkên ku rastî wan tên di makenîzmeya belavkirinê de anîn ziman.

Beşdaran mekanîzmeya yekgirtina buhaya sotemenî û berhemên wê li tevahiya herêmên Bakur û Rojhilatê Sûriyê gotûbêj kirin.

Girêdayî mijarê hevserokê Meclisa Rêveber Abid Hamid El-Mihbaş ji ajansa me re axivî. El-Mihbaş destnîşan kir ku ji bo naskirina pirsgirêka kêmbûnê, dê rêjiya sotemeniyê ku ji rêveberiyan re hatiye veqetandin were kontrolkirin, her wiha mekanîzmeya belavkirinê li stasyonan û şêniyan were diyarkirin. Her wiha rê li ber derxistina sotemeniyê ji derve bi awayekî qaçaxçî were girtin.

(şx)

ANHA