Greva birçîbûnê ya li Dirbêsiyê di roja duyemîn de didome

Greva birçîbûnê ya 150 şêniyên navçeya Dirbêsiyê di roja duyemîn de didome.

NÛÇE

6 sibat, 2019 16:58

HESEKÊ

Li navçeya Dirbêsiyê ya kantona Hesekê bi armanca rakirina tecrîda li dijî Rêberê Gelê Kurda Abdullah Ocalan û piştgiriya Leyla Guven 150 kes duh ketin greva birçîbûnê. Bi vê armanca konê çalakiyê li Qada Şehîdan hate vedan. Çalakî bi dirûşmeya "Bi rihê berxwedana girtiyan em ê tecrîdê hilweşînin" hatiye lidarxistin.

Bi dehan şêniyên navçeyê, şandeyek ji PYD, Şaredariya Gel û Meclisa Malbatên şehîdan serdana çalakgeran kirin.

Di bin konê çalakiyê de axaftin hatin kirin. Bi navê Şaredariya Gel a navçeyê Mizgîn Şêxê, bi navê PYD‘ê Xelîl Osman û bi navê Komîteya Pewerdeyê Mihemed Salih axivîn.

Qisekeran berxwedana çalakgerên grevên birçîbûnê silav kirin û bang li civaka navdewletî kirin ku tecrîdkirina Ocalan bi dawî bikin û jiyana çalakgerên greva birçîbûnê biparêzin.

Axaftvana di nav gotinên xwe de teqez kirin ku azadiya Ocalan azadiya tevahiya gelên herêmê ji zulim û zordariyê ye.

Tê payîn ku çalakiya konvedanê sibe bi dawî bibe.

(şx)

ANHA