Şehîdên Şerê Tinekirina Terorê li Dêrazorê hatin veşartin

DÊRAZOR

Bi sedan şêniyên bajaroka Bisêra û şervanên QSD‘ê cenazeyê şervanên QSD‘ê Umer Ehmed (Cerah), Îbrahîm Kamil Şahir (Umer) û Yasin Xelef (Hesen El-Hamid) yên di "Şerê Tinekirina Terorê" de şehîd bibûn, li Goristana Şehîd Hanî El-Hesen spartin axê.

Girse cenazeyê şehîdan ji ber derketina bajaroka Bisêrayê wergirtin û bi kerwanekî ber bi Goristana Şehîd Hanî El-Hesen ve ketin rê.

Merasîm bi bîranîna şehîdan û torana leşkerî ya şervanên QSD‘ê dest pê kir.

Piştre, ji fermandarên QSD‘ê Hisên El-Hemada axivî û ji malbatên şehîdan re sersaxî xwest, her wiha soza şopandina xeta şehîdan heta rizgarkirina tevahî herêmê ji terorîstan da.

Endamê Meclîsa Malbatên Şehîdan Sabirîn Mihemed jî axivî û got: "Şehîdn me mişeleya azadiyê ne ku rêya me ronî kirine, berdêl çi dibe em ê serî natewînin û em ê xeta wan bişopînin."

Di merasîmê de Meclisa Malbatên Şehîdan nasnameya 12 şehîdên QSD‘ê ku di Şerê Tinekirina Terorê de şehîd bûne eşkere kir; Silêman El-Mixlif (Dawûd), Mihemed El-Nayîf (Şeyûr), Sibih El-Nasir (Rîtac), Mihemed El-Mihemed (Wail), Hisên El-Hesen (Xeyd), Mihemed Hemed (Ebd El-Şayatî), Seed El-Şerqawî (Umer), Feysel El-Hemed (Mihemed), Nasir El-Xelef (Salih Kişkiyê), Beşar El-Celûd (Egîd Ebû Hemam), Ehmed Etiya (Mihemed) û Rexîb El-Hesen.

Rêvebera Meclisa Malbatên Şehîdan Wefa Celal piştî ku nasnameyên şehîdan xwend rastî malbatên wan kirin.

Şervanên QSD‘ê cenazeyê şehîd Umer Ehmed, Îbrahîm Kamil Şahir û Yasin Xelef di nava dirûşme û tilîliyên dayikan spartin axê.

ANHA