Ji eniyên Dêrazorê: Em bi hemû hêza xwe hewl didin sivîlan biparêzin

DIYAR EHMO / DÊRAZOR

Qonaxa dawîn a pêngava Bagera Cizîrê ya bi navê Şerê Tunekirina Terorê bi hemû hêza xwe li dijî çeteyên DAIŞ`ê di baregehên wan ên dawîn li Dêrazorê de didome. Tenê 5 kîlometreçargoşe li gundê Baxoza Jorîn di bin dagirkeriya çeteyên DAIŞ`ê de maye û piştî ev herêm were rizgarkirin, êdî hebûna DAIŞ`ê li rojhilatê Firatê tune dibe.

Çeteyên DAIŞ`ê ji bo rêgirtina li pêşiya pêşdeçûyînên şervanan, sivîlan wek mertalên zindî bi kar tînin. Her wiha şênî bi rêya korîdorên mirovî ku ji aliyê şervanên QSD`ê ve ji bo rizgarkirina sivîlan hatine vekirin, direvin û xwe dispêrin herêmên rizgarkirî.

Di vê çarçoveyê de, yek ji fermandarên Meclisa Leşkerî ya Minbicê Esed Ebûd Stêf ji ajansa me ANHA`yê re axivî. Ebûd Stêf ku bi erka rizgarkirina sivîlan radibe û wiha got: "Em di demên cuda de diçin xetên pêş ên di navabera şervan û çeteyên DAIŞ`ê de. Li wê derê bi sedan sivîl hene. Bi rêya korîdorên ewle em sivîlan digihînin herêmên rizgarkirî."

Der barê mayînên ku ji aliyê çeteyên DAIŞ`ê ve hatine çandin de, Stêf ev tişt got: "Çeteyan mayin bi awayekî zêde li her derê çandine û bi taybet li ser rêyên ku sivîl bi kar tînin. Li wan herêman bi dehan sivîl bûne qurbaniyên vê yekê."

Stêf got ew wek şervanên QSD`ê birîndaran dibin nuqteyên tenduristiyê da ku wan derman bikin û got ew bi hemû hêza xwe hewl didin sivîlan biparêzin û tu zerar negihîje wan.

Ji fermandarên Meclisa Leşkerî ya Minbicê Esed Ebûd Stêf di dawiya axaftina xwe de got rewşa sivîlên ku li herêmên di bin dagirkeriya çeteyên DAIŞ`ê de pir ne baş e, bi sedan malbat û hejmareke mezin ji zarokan li wê derê hene.

(bx)

ANHA