Şehîd Îsmaîl li Kobanê hat oxirkirin

KOBANÊ

Bi sedan şêniyên kantona Kobanê, şehîd Îsmaîl Şêx Îbrahîm (Îsmaîl) endamê Hêzên Xweparastinê ku dema li ser erka xwe bû di 30`ê Çileyê de şehîd bû, bi merasîmekê li Goristana Şehîd Dîcle oxir kir.

Merasîmê bi deqeyeke rêzgirtinê dest pê kir, paşê li ser navê Desteya  Xweparastinê Halim Kobanê destnîşan kir ku rêya şehîdan pîroz û durist e û wiha got: "Ev meh, meheke pîroz û girîng e, ji ber ku ev meha rizgarkirina Kobanê ye. Dewleta Tirk di sala 2014`an de wekî van rojan digot Kobanê ha ket û ha dikeve. Lê Kobanê bi ser ket û bû sembola azadiyê. Em jî wek Xweparastinê soz didin em ê rêya wan bişopînin."

Paşê bi navê Partiya Yekitiya Demokratîk (PYD) Bekir Hec Îsa di şexsê şehîd Îsmaîl de hemû şehîd bi bîr anîn û wiha axivî: “Gelên ku ne xwedî çanda berxwedanê û felsefeya şehîdan bin, dê ew gel têk biçin. Partiyên siyasî kesên ku xwe ji gelan re rêveber dibînin, eger xeta şehîdan neşopînin ew tu car ne layiqî rêveberiya gelan in. Bingeha şoreşa me li ser şehîdên me ye, ev destkeftiyên me îro bi saya xwîna wan hene."

Di dawiyê de wesîqeta şehadetê ji aliyê Meclisa Malbatên Şehîdan ve hate xwendin û diyarî malbata şehîd hate kirin.

Şehîd Îsmaîl bi tilîlî û dirûşmên “Şehîd namirin” hate oxirkirin.

(şm-hk/bm)

ANHA