Weqfa Jinên Azad li Hesekê buroyek vekir

HESEKE

Weqfa Jinên Azad li taxa El-Muftî ya kantona Hesekê buroya xwe ya duyemîn vekir. Endamên Kongreya Star, Mala Jinan, hevseroka Meclisa kantona Hesekê Semer El-Ebdullah û bi dehan şêniyên bajêr beşdarî merasîma vekirina buroyê bûn.

Berdevka Weqfa Jinên Azad a kantona Hesekê Xewle Xelef, vekirina buroyê li tevahî jinên kantonê û bi taybet li jinên Hesekê pîroz kir.

Xewle diyar kir ku Weqfa Jinên Azad ji 2014`an ve bi dirûşmeya "Jina azad bingeha civaka azad e" hatiye vekirin. Xewle got ji bo pirsgirêkên civakê bên derbirandin û çareseriyên guncaw jî jê re bên dîtin, xebatên xwee didomînin.

Xewle da zanîn ku ew wek Weqfa Jinên Azad serbixwe ne û wiha got: “Kar û bernameyên me bi awayê proje û çalakiyên ji bo pêşketina civakeke azad, demokrat û xwezayî tên meşandin.”

Xewle gotinên xwe wiha domandin: “Armanca vekirina buroyê, hêsankirina hemû çalakiyên çareserkirina pirsgirêkên jinan û zarokan di giştî aliyên jiyanê de, piştevaniya zanebûna jinan û parastina wan ji kevneşopiyên girêdayî civaka klasîk e. Di heman demê de di aliyê aborî de jî peydakirina kar e.”

Xewle gotinên xwe wiha bi dawî kirin: “Em wek jinên Bakur û Rojhilatê Sûriyê piştgiriya siyasetmedara Kurd Leyla Guven dikin. Dê çalakiyên li dijî tecrîda girankirî ya li ser Rêberê Gelê Kurd Abdullah Ocalan bidomînin.”

Merasîm bi stranên Koma Şehîd Ronak a girêdayî Weqfa Jinan bi dawî bû.

Hêjayî bibîrxistinê ye ku Weqfa Jinên Azad li Dêrik, Rimêlan, Serêkaniyê, Kampa Roj, Kampa El-Hol û Kobanê buroyên xwe vekirine.

ANHA