Çalakiya konvedanê ya Minbicê bi dawî bû

MINBIC

Çalakiya kon a gundewarên bajarê Minbicê ku 3 rojan dewam kir, bi dawî bû. Konê çalakiyê îro li gundê El-Hidhid li xeta El-Heyê ya rojhilatê Minbicê hate vedan. Di konê çalakiyê de bi sedan şêniyên gundên derdorê, endamên sazî û komîteyên girêdayî Rêveberiya Sivîl a Demokratîk beşdar bûn.

Çalakiyê bi deqeyeke rêzgirtinê dest pê kir, paşê gelek axaftin hatin kirin. Hevserokê Meclisa El-Heyê Ebdilasid El-Şiyûxî axivî û gefên Tirkiyê yên li ser Bakur û Rojhilatê Sûriyê şermezar kirin.

El-Şiyûxî destnîşan kir ku bi saya xwîna şehîdan ev ax hate rizgarkirin û wiha pê de çû: “Me şerê terorê kir, îro dagirkeriya Tirkiyê dibêje hûn teror in, em van gefan qebûl nakin û em ê heta serkeftinê li ber xwe bidin.”

Paşê fermandarê Meclisa Leşkerî ya Minbicê Seîd El-Qibê axivî û wiha got: "Ev ax bi saya xwîna şehîdan hate rizgarkirin, dê ev xwîna ku parastina yekbûna ax û gel kir, vala neçe."

El-Qibê soz da gel û şehîdan ku ew ê parastina yekbûna xakê bikin û wiha got: "Em nahêlin tu hêzên leşkerî bikevin herêmên me."

Her wiha di çalakiyê de bi navê xet û meclisan endama rêveberiyê Fatima Beko jî axivî û diyar kir ku ew li wir dicivin ku gefên Erdogan pûç bikin û bi bîr xist ku Erdogan bi hinceta şerê li dijî terorê û parastina ewlehiya xwe ya neteweyî gefên êrîşkirinê li herêmên Bakur û Rojhilat Sûriyê dixwe.

Fatima daxuyaniyên Erdogan şermezar kirin û wiha got: "Ne me destwerdana karê Sûriyê kir û ne me kampên perwerdeyê ji komên îslama tundraw re vekir."

Çalakiya kon bi dirûşmeyên silavkirina berxwedana gel bi dawî bû.

(jo/bm)

ANHA