Rûspiyên Ereb: em ê bi yek destî li hemberî dagirkeriya Tirk bisekinin

HESEKÊ

Çalakiya konvedanê ya bajarê Serêkaniya ya kantona Hesekê li ser sînor di roja xwe ya 21'an de didome. Rûspiyên êlên Ereb ên navçeyên Til Hemîs û Til Birakê yên kantona Qamişlo tev li çalakiyê bûn û girêdayî gefên Tirkiyê li dijî herêmê nêrînên xwe bi ajansa me re parve kirin. Rûspiyan teqez kirin ku ew ê li hember her êrîşekê li dijî herêmê bisekinin.

Mihemed Xelef El-Xilewî yê ji êla El-Şerabîn a navçeya Til Hemîsê gefên Tirkiyê li dijî herêmê şermezar kir û destnîşan kir ku herêm bi saya xwîna şehîdên QSD'ê hatiye rizgarkirin.

El-Xilewî wiha domand: "Erdogan komên çete di serî de DAIŞ'ê şand herêmê û komkujî li ser gelê me de pêk anîn. Cîhan bû şahidê serkeftinên şervanên me ku mezintirîn û xetertirîn komên terorîst qewitandin. Bi saya hevgirtina me di bin bangê projeya neteweya demokratîk û biratiya gelan de em bihêz bûne û kes nikare rêya me asteng bike."

Girêdayî heman mijarê Ebidusemed Ebid El-Balî yê ji êla El-Sada El-Tifêhîn a navçeya Til Hemîsê teqez ku ew dagirkirina Tirkiyê ji xaka herêmê bi tundî red dikin û got, ew ê li hember gefên Tirkiyê bisekinin.

Ji aliyê xwe ve Hisên Hamid Telabê yê ji êla El-Şemer ji navçeya Til Birakê gefên Tirkiyê li dijî herêmê şermezar kir û got: "Em tev li çalakiyê bûn da ku ji dewleta Tirk re isbat bikin ku  ji bo parastina xaka welat em bi yekrêzî di eniyên pêş de disekinin û em ê bisekinin."

Abdullah Selûm ê ji êla El-Şerabîn li navçeya Til Hemîsê detnîşan kir ku bi saya xwîna şehîdan herêm ji çeteyan hatin paqijkirin û got: "Em bi azadî li ser xaka xwe dijîn, em destur nadin Tirkiyê ku destkeftiyên şehîd û gel têk bibe.

Selûm wiha domand: "Em ji Erdoganê hov re dibêjin, em ê bi yekrêzî li hember her êrîşekê bisekinin. Ji ber ku em yek gel in û dê tiştek me ji hev cuda neke."

(şx)

ANHA