Cenazeyê şehîd Elî bi merasîmekî girseyî hate veşartin

QAMIŞLO

Bi hezaran şêniyên şêniyên Dêrik, navçeyên Girkê Legê, Çil Axa û Til Koçer cenazeyê şervanê QSD‘ê Mihemed El-Elî (Elî) ku di qonaxa dawî ya Pêngava Bagera Cizîrê ya Şerê Tinekirina Terorê de şehîd bibû ji nexweşxaneya Şehîd Hogir a bajarê Dêrikê wergirtin û bi kerwanekî girseyî ber bi goristana şehîdan a navçeya Til Koçerê ve derxistin.

Kerwanê cenaze  li goristanê ji aliyê şêniyên navçeya Til Koçerê ve bi tilîliyên dayikan û dirûşmeyên "Şehîd Namirin" hate pêşwazîkirin.

Li goristanê marasîm bi toraneke leşkerî ji hêla şervanên YPG`ê ve dest pê kir.

Ji fermandarên YPG`ê Herekol Girziyarat axivî û sersaxî ji malbata şehîd re xwest û got :" Em ji mirinê natirsin, tirsa me ew e ku li ser gelê me zulim û tecawiz pêk were, em amade ne axa xwe bi canê xwe biparêzin. "

Bi navê Rêveberiya Xweser a herêma Cizîrê Hevserokê Desteya Şaredariyên Herêma Cizîrê Ebdulehed Gewriyê axivî û sersaxiya malbata şehîdan kir û got: "Şehîd Elî û şehîdên beriya wî karîbûn rêya azadiy nîşanî gelan bidin. Keç û xortên me ji bo jiyaneke azad canê xwe feda kirin."

Gewriyê bal kişand ser gefên Tirkiyê li ser Bakur û Rojhilatê Sûriyê û wiha anî ziman: "Gefên Erdogan nasekinin. Em van gefan bi cidî digirin, di vê rewşa zor û zehmet de divê em bi yek destî kar bikin, me dikarî bi hev re bi azadî gavan bavêjin û bi hev re me Rêveberiya Xweser ava bikin ku ji Tirkiyê re bûye tirs."

Piştî axaftinan nasnameya şehîd hate xwendin û radestî malbatê hate kirin.

Cenazeyê şehîd di nava dirûşmeyan de hate definkirin.

(dh)

ANHA