Şehîdên 'Şerê Tinekirina Terorê' li Reqayê hatin oxirkirin

REQA

Şêniyên bajarê Reqayê û gundewarê wê cenazeyê şehîdên QSD'ê Fewaz El-Hewaş (Zêbeq)û Xelef El-Mihêmîd (Ebû  El-Nisir) ku di 'Şerê Tinekirina Terorê' de şehîd bibûn li ber çarxerêya Firûsiyê wergirtin û ber bi Goristana Şehîdan a Reqayê ya gundê El- Hikumiyê ketin rê.

Bi dehan şêniyên gundên Hezîma, El-Ebara û El-Hikumiyê li benda kerwanan şehîdan bûn. Piştre hevalên her du şehîdan, cenazeyên şehîdan e hilgirtin ser milên xwe û danîn ser dika goristanê.

Merasîm bi deqeya rêzgiretin û tûrana leşkerî ji hêla şervanên QSD'ê ve destpê kir.

Paşê bi navê QSD'ê fermendar Umer Reqa axivî û destnîşan kir ku li gel gefên Tirkiyê herêm di şert û mercên dijwar re derbas dibe û wiha got: "Em ji wan re dibêjin her çendî em rastî êrîşan werin, em şehîdan didin û em ê bidin. Li hember hemû komployên li dijî gelê me em ê bisekinin."

Di dawiya axaftina xwe de Umer Reqa soza parastina destkeftiyên ku bi saya xwîna şehîdan hatine bidestxistin da.

Her wiha bi navê Meclisa Malbatên Şehîdan endamê rêveber Ebûd El-Salih axivî û sersaxî ji dayikên şehîdan re xwest. El-Salih destnîşan kir ku her çiqas şehîdan bidin dê paşde gav nevêjin û saziyên ku bi saya şehîdan hatine vekirin dê biparêzin. El-Salih soza şopandina rêya şehîdan ta serkeftinê da.

Piştre nasnameyên şehîdan hatin xwendin û radestî malbatên wan hatin kirin. Di dawiya merasîmê de hevalên şehîdan, cenazeyên her du hevalên xwe di nav tlîliyên dayikan de li goristanê veşartin.

(şx)

ANHA